Saturday, June 2, 2018

கோவை மெஸ் - சட்னி முறுக்கு, நாமக்கல், CHUTNEY MURUKKU, NAMAKKAL


நாமக்கல் ரவுண்ட் அப் :
சட்னி முறுக்கு :
                 நாமக்கல்லை சுற்றி உள்ள திருச்செங்கோடு ரோடு, சேலம் ரோடு, சேந்தமங்கலம் ரோடு, துறையூர் ரோடு, மோகனூர் ரோடு, பரமத்தி ரோடு, திருச்சி ரோடு போன்ற அத்தனை ரோடுகளிலும் தள்ளுவண்டி கடைகள் நிறைய இருக்கின்றன.இட்லி முதல் சிக்கன் சில்லி, பீஃப் சில்லி வரை பெரும்பாலான கடைகள் நீக்கமற நிறைந்திருக்கின்றன.இத்தகைய தள்ளுவண்டிகளில் புதுவித மெனுவினை கண்டது துறையூர் ரோட்டில் தான்.சட்னி முறுக்கு எனும் ஸ்பெசல் மெனுவை ருசித்துப் பார்த்தேன்.கரூரில் எப்படி கரம் மிகப்பிரபலமோ அது போல சேலம் மற்றும் நாமக்கல்லில் தட்டுவடை செட் பிரபலம்.அப்படித்தான் தட்டுவடை செட் ருசிக்க செல்லும் போது தான் சட்னி முறுக்கினை சுவைக்க நேர்ந்தது.

                 சின்ன சின்ன முறுக்கினை, தக்காளி சட்னி வாளியில் போட்டு சிறிது நேரம் ஊற வைக்கின்றனர்.பின் அதை எடுத்து தட்டில் வைத்து கேரட் வெங்காயம் பீட்ரூட் தூவல்களை தூவி தருகின்றனர்.சாப்பிடும் போது முறுக்கின் மொறு மொறு தன்மை குறைந்து அதன் சுவை தக்காளி சட்னியோடு சேர்ந்து காரம் மற்றும் இனிப்பு கலந்த இன்னொரு சுவையை தருகிறது.கூடவே வெங்காயம் கேரட், பீட்ரூட் சுவைகளும் சேர்ந்து புது விதமாக சுவையை தருகிறது.இந்த சட்னி முறுக்கு சாப்பிட நன்றாகவே இருக்கிறது.மென்மையாகவும், இனிப்பாகவும் கொஞ்சம் காரமாகவும் இருக்கிறது.


                     இதைப் போலவே தான் தட்டு வடை செட்டும்.தட்டு முறுக்கில் இரண்டு வகை சட்னிகளை தோய்த்து, கேரட் பீட்ரூட், வெங்காய துருவல்களை வைத்து, பின் அதன் மேல் இன்னொரு சட்னி தோய்த்த தட்டு முறுக்கினை வைத்து தருகின்றனர்.மேலும் கீழும் உள்ள தட்டு முறுக்கினை அப்படியே அலேக்காக சிந்தாமல் சிதறாமல் தூக்கி வாய்க்குள் போட்டு சுவைக்க ஆரம்பித்தால் அத்தனை சுவைகளும் வரிசை கட்டி நாவில் நாட்டியமாடும்.கொஞ்சம் கொஞ்சமாய் வயிற்றுக்குள் இறங்கும் வரையிலும் சுவை இருக்கும்.




                  நாமக்கல்லில் தள்ளுவண்டி தவிர்த்து, கடைவீதிக்குள் ஒரு சட்னி முறுக்கு கடை இருக்கிறது. M.தங்கராஜ் சட்னி முறுக்கு கடை.இந்த கடை மிக பிரபலம் அந்த பகுதிக்குள்.பெண்கள் மட்டுமே இதை நடத்துகிறார்கள்.மாலை வேளையில் இருந்து இரவு பத்து மணி வரை இங்கு அனைத்து சாட் வகைகளும் கிடைக்கும்.விலை பத்து ரூபாயில் இருந்து ஆரம்பிக்கிறது.சட்னி முறுக்கு ரூ 20 விலையில் இருக்கிறது.அந்தப்பக்கம் போனீங்கன்னா, மாலை வேளையில் ஸ்நாக்ஸ் சாப்பிடனும்னு தோணுச்சின்னா, மறக்காம போய் சாப்பிட்டு பாருங்க…


நேசங்களுடன்
ஜீவானந்தம்.

இன்னும் கொஞ்சம்...

Tuesday, May 29, 2018

கோவை மெஸ் - சரவணா ஹோட்டல் - அசைவம், பலபட்டறை மாரியம்மன் கோவில் பின்புறம், நாமக்கல். KOVAI MESS - SARAVANA HOTEL, PALAPATTARAI MARIAMMAN TEPLE BACK, NAMAKKAL

அசைவம் தேடி ஒரு பயணம்

                     ஞாயிற்றுக்கிழமை என்றாலே நாவுக்கு ருசியாய் அசைவம் சாப்பிடுவது என்பது வழக்கமாகி விட்டது.இன்றும் அப்படித்தான்.நாமக்கல்லில் அசைவம் தேடி பயணித்தோம்.மாலை வேளைகளில் பரமத்தி ரோடு, திருச்சி ரோடு, சேலம் ரோடு, திருச்செங்கோடு ரோடு, துறையூர் ரோடு, மோகனூர் ரோடு, சேந்தமங்கலம் ரோடு என பல ரோடுகளிலும் பீஃப் என்பது கொடிகட்டிப் பறக்கும்.ஆனால் காலை வேளைகளில் எங்கும் இருப்பதில்லை.இன்று ஞாயிறு என்பதால் பீஃப் தவிர்த்து ஆட்டின் இறைச்சி வகைகளை தேடி அலைந்தோம்.மேற்சொன்ன எந்த ரோடுகளிலும் குடலும் மட்டனும் இல்லை.சிக்கன், காடை வகைகள் மட்டும் ஒரு சில ஹோட்டல்களில் இருந்தன.

                   ஞாயிற்றுக்கிழமை இட்லியும் குடற்கறியும் இருந்தால் செமயாக இருக்கும் என்பதால் அதை தேடியே ஓடினோம்.இறுதியில் எப்போதோ நம் பங்காளிகளில் ஒருவர் பலபட்டறை மாரியம்மன் கோவில் பின்புறம் இருக்கும் ஒரு ஹோட்டலில் அனைத்தும் கிடைக்கும் என சொன்னது ஞாபகம் வர, அடுத்த சில நிமிடங்களில் ஆஜரானோம்.போர்டு என்பதே இல்லை கடைக்கு.கடை விஸ்தாரமாக இருக்கிறது.

             புரோட்டாக்கள் சுடச் சுட கல்லில் வெந்து கொண்டிருக்கின்றன.டேபிள்கள் அனைத்திலும் ஒவ்வொருவரின் இலையிலும் ஏதோ ஒரு அசைவம் இடம் பெற்றிருக்கிறது.நாங்களும் உள் நுழைகையிலே என்ன இருக்கிறது என்றே கேட்டு விட்டு போனோம்.வாழை இலை வைத்தவுடன் ரத்தப்பொரியலை வந்து சேர்ந்து.சின்ன சின்ன வெங்காயத்துடன், பச்சை மிளகாய் நறுக்கி போட்டு, தேங்காய் துருவலுடன் ரத்தப்பொரியல் உதிரி உதிரியாக இருக்க, கொஞ்சம் எடுத்து வாயில் போட சுவை அப்படியே நரம்புகளில் பாய்ந்தது.

                  மிக நன்றாகவே இருக்கிறது.அடுத்து குடல்..தோசைக்கல்லில் வெங்காயம் கறிவேப்பிலை போட்டு வதக்கி அதனுடன் குடல் கறியை குழம்போடு சேர்த்து பிரட்ட, அப்பொழுது ஒரு வாசனை வருமே..அது இன்னும் நம் பசியை அதிகரிக்கும்..நன்கு குழம்பு சுண்ட, கொஞ்சம் மிளகுத்தூளைத் தூவி, கல்லில் இருந்து எடுத்து சுடச் சுட இலையில் வைக்கும் போது அதன் ஆவி அப்படியே முகத்தில் அடிக்குமே, அந்த வாசனை நம்மை சொர்க்கத்திற்கு இழுத்துச் செல்லும்.கொஞ்சம் எடுத்து வாயில் இட அப்படியே கரையும் பாருங்க..ஆஹா..

               சுவையோ சுவை.கொஞ்சம் தோசையோடு குடல்கறியை சேர்த்து சாப்பிட பக்கத்திலேயே சொர்க்கம் அமர்ந்திருக்கும்.நல்ல சுவை.அடர்த்தியும் அதிகம்.விலையோ குறைவு..80 ரூபாய் தான்.சாப்பிட சுவையாக இருக்கிறது.ரத்தம் 40 ரூபாய்.அதுவும் செம டேஸ்ட் தான்.சூடான இட்லிக்கு ரத்தப்பொரியல் செம காம்பினேசன் எப்பொழுதும்..கொஞ்சம் லேட்டாய் போனதால் இட்லி இல்லாமல் போய்விட்டது.கடையில் இன்னும் கொஞ்சம் விசாரித்ததில் முயல் கறியும், காடையும் மாலை நேர ஸ்பெஷல்களாம்.இரத்தப்பொரியல் மட்டும் ஞாயிற்றுக் கிழமை கிடைக்கும்.மற்ற நாட்களில் காலை 7.30 க்கு குடல் மற்றும் அசைவ உணவுகள் தயாராக இருக்குமாம்.நாமக்கல் மாவட்டத்தில் கலக்கி மிகவும் பிரபலம்.அதுவும் குழம்பு கலக்கி மிக டேஸ்டாக இருக்கும்..கொஞ்சம் இளகிய பதத்தில் கலக்கி சாப்பிட்டால் செம டேஸ்ட் ஆக இருக்கும்.



லேட்டஸ்ட் அப்டேட்:
                        முயல் கறி ஆசையை தூண்டிவிட்டதால் அடுத்த நாள் மாலையே அங்கு மீண்டும் ஆஜரானோம்.இரண்டு இட்லிகளை மட்டும் வாங்கி கொண்டு முயல் கறியை ஃபிரை செய்ய சொன்னோம்.இட்லிக்கு கொஞ்சம் முயல் கறி குழம்பை ஊற்றிவிட்டு போக, அதில் இட்லியை தொட்டு சாப்பிட்டு கொண்டிருந்த வேளையில், தோசைக்கல்லில் வெங்காயம் கறிவேப்பிலை வதங்கும் வாசனையில் பசி நரம்புகள் இன்னும் அதிகமாக துடிக்க ஆரம்பித்தன.முயல் கறியை போட்டு வதங்கிய வெங்காயத்துடன் ஃபிரை செய்யும் போது அதன் வாசனை, எப்போது முயல் கறி நம் இலைக்கு வரும் என எதிர்பார்க்க ஆரம்பித்தது.கொஞ்ச நேரம் தான், முயல் வந்து சேர்ந்தது.இலையில் வைக்க, ஆவி பறந்தது.கொஞ்சம் இட்லி பிய்த்து கறியோடு சேர்ந்து சாப்பிட நாவிற்கு புது சுவை உண்டானது.முயல் கறி கொஞ்சம் ரப்பர் போன்று தான் இருக்கும்,ஆனால் சுவையாக இருக்கும்.நன்றாக மென்று முழுங்க சுவையாக இருக்கும்.எலும்புகள் கொஞ்சம் கடினமாக வே இருக்கும்.காட்டு முயல் அல்லவா…இட்லிக்கு தோசைக்கு, இவர்கள் வைக்கும் அடர்த்தியான குழம்பு மிக சுவையாக இருக்கிறது.முயல் கறியின் விலை ரூ 110.தினமும் கிடைக்க வாய்ப்பில்லை.



               எப்பொழுதெல்லாம் முயல் சந்தைக்கு வருகிறதோ அப்பொழுதெல்லாம் கிடைக்கும்.வாரத்தில் நான்கு நாட்கள் கட்டாயம் கிடைக்கும்.அந்தப் பக்கம் போனால் நல்ல கார சாரமாக சாப்பிட்டு விட்டு வாருங்கள்
கடை அமைவிடம் :
பலபட்டறை மாரியம்மன் கோவில் பின்னாடியே இருக்கிறது இந்த ஹோட்டல்.இதன் எதிர்ப்புறம் அண்ணாமலை ஹோட்டல் ஒன்றும் இருக்கிறது அங்கும் சூடான புரோட்டா, அசைவ குழம்பு வகைகள் சுடச்சுட கிடைக்கும்.

நேசங்களுடன்
ஜீவானந்தம்.
         
இன்னும் கொஞ்சம்...