கோவை மெஸ் - நியூ கமாலியா ஹோட்டல், விருதுநகர்

கோவை மெஸ் - நியூ கமாலியா ஹோட்டல், விருதுநகர்

நெல்லையில் இருந்து ரிட்டர்ன் வரும்போது விருதுநகர் ஊர் வந்தவுடன் புரோட்டா ஞாபகம்..அட....இங்க புரோட்டா பேமஸ் ஆச்சே ...சரி ஒரு பதிவை சாப்பிடலாம்னு சாரி தேத்தலாம்னு பைபாஸ் ரோட்டில் இருந்து இரண்டு கிலோமீட்டர் பயணித்து விருது நகர் பஸ் ஸ்டாண்ட் வந்தோம்.உள்ளே ஊருக்குள் நுழையும் போதே சின்ன சின்ன ஹோட்டல்களில் சூடாய் அந்த மதிய வேளையிலும் கல்லிலே எண்ணையில் பொரித்து ரெடியாகிக் கொண்டிருந்தது.

அங்கே இருந்த ஆட்டோ டிரைவரிடம் எந்த ஹோட்டல் நன்றாக இருக்கும் என்று நம்ம சிங்கத்தின் உள்ளே இருந்து கேட்கவும் அவர்கள் நம் வண்டியை பார்த்துவிட்டு கொஞ்சம் பெரிய ஹோட்டலாக சொல்லிவிட்டனர். விருதுநகரிலேயே ஏசி போட்ட ஹோட்டல் இதுவாகத்தான் இருக்கும் போல...வண்டியை கொஞ்ச தூரம் முன்பே நிறுத்திவிட்டு அந்த அடிக்கிற வெய்யிலில் நடக்க கொஞ்சம் சோர்ந்து தான் போனோம்...அம்புட்டு வெயில்...இருக்கிற கொஞ்ச நஞ்ச பூஸ்டும் காணாமல் போகவும் ஹோட்டலை அடையவும் சரியாய் இருந்தது.

 

 

 ஹோட்டல் .நியூ கமாலியா போர்டில் நிறைய எழுத்துக்கள் காணோம்.. ஹோட்டல் முழுக்க முழுக்க வெறும் போர்டுகளால் நிறைந்து இருக்கிறது.உள்ளே நுழைய மக்கள் கொஞ்சம் நிறைந்து இருந்தனர்.நம்மைப்பார்த்தவுடன் மேலே ஏசி இருக்கிறது என்று அனுப்பிவைத்தனர்.

கொஞ்சம் பேர் மட்டுமே ரசித்து ருசித்து கொண்டு இருந்தனர்.எப்பவும் போல வாஸ்து படி அமர்ந்து விட்டு நிமிர்கையில் கையில் ஆர்டர் எடுக்க தயாராய் சர்வர்...என்ன ஸ்பெசல் என்று கேட்க புறா வறுவல் இருக்கிறது என்று சொல்லவும் புரோட்டாவை விட்டு விட்டு புறாவை பிடிக்க சொன்னோம்.

புறாவுக்கு இணையாய் கோழி இருக்கட்டுமே என்று பிரியாணி சொன்னோம்.

அப்படியே ஒரு ஆட்டு குடல் ஒன்றும் சொல்ல பறந்தோடி சென்றார் புறாவினை பிடிக்க...

கொஞ்ச நேரத்தில் தெம்பாய் இருக்க வேண்டும் என்பதற்காகவே சூப் வந்தது. அதை குடித்து முடிப்பதற்குள் பிரியாணி வர...கோழி வேட்டையில் இறங்கினோம்.

பாசுமதி அரிசி தான்..கொஞ்சம் சுமார்தான்.அரிசி உதிரியாகவே இல்லை.கோழி அப்படியே பாதி பீஸ் ...நல்ல பொல பொல வென்று நன்றாக வெந்து இருந்தது.ஆனால் கொஞ்சம் கூட கோழியின் உடம்பில் மசாலா நிறம் இல்லை..ஆனால் சுவையாய் இருந்தது.

அடுத்து புறா நல்ல மணத்துடன் நம்மை நோக்கி தூது செல்ல வருவது போல குழம்பு பதத்தில் வந்தது.முழு புறாவாக நன்கு வேக வைக்கப்பட்டு நன்றாக இருந்தது.ரொம்ப சின்ன புறா போல...சைஸ் சிறிது தான்.சுவை நன்றாக இருக்கிறது.

அடுத்து வந்த மட்டன் குடல் நன்றாகவே இல்லை.குடல் குழம்பாய் வந்தது. பிரை செய்து கொடுங்கள் என்று சொல்லவும், குழம்பை வடிகட்டி விட்டு வெங்காயம் போட்டு ஃபிரை செய்து கொண்டு தந்தனர்.சுவைத்து பார்க்கையில் நான் சமைக்கும் அளவிற்கு கூட இந்த குடல் குழம்பு இல்லை.அவ்ளோ மோசம்.மணம், சுவை,  திடம் என்று திரி ரோசஸ் போல எதுவுமே இல்லை...

பில் வந்தது...விலை மிக அதிகம்.அந்த ஊருக்கு அதிக விலை.நல்ல வேளை..ஏசிக்கு என்று தனியாக பில் போடவில்லை.அந்தப்பக்கம் போனால் கண்டிப்பாக புரோட்டா இருக்கா என்று கேட்டு விட்டு அந்த ஹோட்டலுக்கு செல்லுங்கள்...

விருது நகர் வந்த நோக்கமே புரோட்டா சாப்பிடத்தான்..ஆனால் இந்த ஹோட்டலில் வந்து கேட்கவும் புரோட்டா மதியம் இல்லை என்று கை விரித்து விட்டனர்.ஆனால் சாயந்திரம் கிடைக்கும் என்று சொல்லிவிட்டனர்.ஒருவேளை புரோட்டா சாப்பிட்டால் பில் குறைவாக வரும் என்று தவிர்த்து விட்டனரா என்று தெரியவில்லை.வெளியூரில் இருந்து வரும் என்னைப்போன்ற சாப்பாட்டு ரசிகர்களுக்காவது வைத்து இருக்கலாம்.

இந்த ஹோட்டல் அருகிலேயே இரண்டு கடைகள் இருக்கின்றன.சுட சுட தயாராகிகொண்டிருந்தது.நாம் தான் ஏமாந்து விட்டோம் போல...

சரி..விருதுநகர் எண்ணைய் புரோட்டா தான் கிடைக்கல...நம்ம சாதா புரோட்டாவது நம்ம ரசிகர்களுக்கு காட்டலாம் என்று ஒரு கடையில் எடுத்த போட்டோ..

 நேசங்களுடன்

ஜீவானந்தம்