த்தூ........ள் கேப்டன் - வெல்லட்டும் கேப்டன் - மக்கள் நலக்கூட்டணி

                     ஊடகங்களின் வியாபார உத்திக்கு, மற்ற கட்சிகளின் அரசியலுக்கு அதிகம் பலியாவது நம்ம கேப்டன் தான்.தத்தம் பத்திரிக்கை, டீவி, இண்டர்நெட் ஊடகங்களின் டி ஆர்பி ரேட்டிங்கிற்காக கேப்டனிடம் மல்லுக்கட்டி வாயைக் கிளறுவது நிருபர்களின் வேலையாகிவிட்டது. கேப்டனின் பேச்சானது எதார்த்தமான வெள்ளந்தியான பேச்சு...மனதில் இருப்பதை பேசுபவர்.எழுதி வைத்துக்கொண்டு பக்கம் பக்கமாக பேசுவது, வார்த்தைகளில் ஜாலம் காட்டி வசியப்படுத்தி பேசுவது என எதுவும் இருக்காது....சொல்ல வந்ததை எதார்த்தமாய் சொல்வதால் என்னவோ இவருக்கு குடிகாரன் பட்டம்.குடிகாரனாம்.... இருக்கட்டுமே... தமிழ்நாடே மதுவை ஊக்குவித்துக் கொண்டு விற்கும் போது கேப்டனைப் பற்றி குறை சொல்வதில் என்ன நியாயமிருக்கிறது?

                        கடந்த தேர்தலில் கேப்டனின் கூட்டணியோடு வெற்றிகண்டு விட்டு பின் அவரை கழற்றி விட்டவர் ஜெயலலிதா.கேப்டன் கூட்டணி இல்லாவிட்டாலும் பெரும்பாலும் ஜெயித்து இருக்கும்.காரணம் திமுக வின் ஊழல், குடும்ப செல்வாக்கு என்கிற காரணத்தினால் மக்கள் அதிமுக வை தேர்ந்தெடுத்தனர்.கேப்டன் ஆதரவு இல்லை என்றாலும் அதிமுக ஜெயித்து இருக்கும்.ஆனால் வாக்கு விகிதங்கள் கொஞ்சம் குறைந்திருக்கும்.இரண்டு கழகங்களின் பொதுவான ஒற்றுமை என்னவெனில் யாரும் ஐந்து வருடங்களுக்கு மேல் ஆட்சி புரிந்ததில்லை.புரட்சித்தலைவர் எம்ஜியாரின் மறைவுக்கு பின் இரண்டு கழகங்களுமே ஊழல் செய்து ஐந்தாண்டுகளுக்கு ஒருமுறை மாறி மாறி ஆட்சியை பிடித்து வருகின்றன.

இந்நிலையில் தான் இரு பெரும் திராவிட கழகங்களுக்கு மாற்றாக வந்தவர்தான் கேப்டன்.தனியே கட்சி ஆரம்பித்து இன்று மக்களுக்காக போராடிக்கொண்டிருப்பது கேப்டன் தான். திமுக வின் கலைஞரும் சரி.... அதிமுக வின் ஜெயலலிதாவும் சரி....தனியாய் கட்சி ஆரம்பித்தவர்கள் இல்லை.ஏற்கனவே நன்கு வளர்ந்துவிட்ட இயக்கங்களைத்தான் இருவரும் இப்போது நடத்திக் கொண்டிருக்கின்றனர்.திமுக வில் கலைஞரின் சாணக்கியத்தனம் மேலோங்கி இருக்கிறது.அஇஅதிமுகவில் ஒருவித சர்வாதிகாரம் இருக்கிறது.அஇஅதிமுக வில் இரட்டை இலை என்கிற சின்னத்தினை பார்த்து இன்னமும் எம்ஜியார் க்காக என்று ஓட்டு போடும் தொண்டர்கள் லட்சம் பேர் இருக்கிறார்கள்.ஆனால் கேப்டன் அப்படியல்ல தனிக்கட்சி ஆரம்பித்து பல லட்சக்கணக்கான தொண்டர்களை தன்வசம் வைத்திருப்பவர்.முதலில்  தன் கட்சியில் இருந்து ஒரு எம் எல் ஏ, பிறகு 29 எம் எல் ஏ என வளர்ச்சி கண்டு தற்போது ஒரு எதிர்க்கட்சித் தலைவராக இருப்பவர்.

                          ஆமாஞ்சாமிகள் போடும் அடிமைகள் கூட்டம் இருக்கும் இடத்தில் தீவிரமாய் எதிர்த்துக் கேள்வி கேட்டவர். நாக்கை துருத்திகாட்டியதை அடிக்கடி ஒளிபரப்பினார்கள் டிவியில்...ஏன் காட்டினார் எதற்கு காட்டினார் என்பதற்குண்டான ஆதாரங்கள் இல்லை.காரணம் ஆட்சியும் காட்சியும் அவர்களிடத்தில்.அதனால்தான் சட்ட சபை நிகழ்வுகளை பொதுவாய் ஒளிபரப்ப வேண்டும் என்று கேப்டன் போராடிக்கொண்டிருக்கிறார்.இன்னமும்.சட்டசபையில் நொடிக்கொரு முறை அம்மா புராணம் பாடும் அடிமைகளிடம் இருந்து அதை கேட்பதை தவிர்க்க சட்டசபைக்கு போவதையே தவிர்த்தார் கேப்டன்..இதற்கும் பொங்கினார்கள்...எதிர்க்கட்சித்தலைவர் சட்டசபைக்கு வருவதில்லை என்று...திமுக ஆட்சியில் இருக்கும் போது அதிமுக எதிர்க்கட்சியாக இருக்கும்.அம்மா வரமாட்டார்கள்.அதிமுக ஆட்சியில் இருக்கும் போது திமுக எதிர்க்கட்சியாக இருக்கும் அப்போது கலைஞர் வரமாட்டார்.ஆனால் தற்போது எதிர்க்கட்சித்தலைவராக இருக்கும் கேப்டன் வராமல் இருப்பதை பெரிது படுத்தி இந்த ஊடகங்கள் ஊளையிட்டுக் கொண்டிருக்கின்றன. அப்படியே சட்டசபைக்கு வந்தாலும் பேசுவதற்கு நேரம் ஒதுக்குவார்களா... அதுவும் இல்லை..அம்மா புராணம் பாடவே அத்தனை அதிமுக எம் எல் ஏக்களும் நேரத்தை எடுத்துக்கொள்வதால் அப்புறம் எங்கே எதிர்க்கட்சி தலைவருக்கு வாய்ப்பு.....மற்ற கட்சி எம் எல் ஏ க்களுக்கு வாய்ப்பு?

              கேப்டனிடம் உரிமையாய் மைக்கை நீட்டி பேசுகிற பத்திரிக்கையாளர்கள் அம்மாவிடம் தைரியமாய் பேசுவார்களா...? கேப்டனிடம் பேட்டி என்கிற பெயரில் அவரை கோவப்படுத்தி, அவர் ஏதாவது சொன்னாலோ செய்தாலோ அதை திரும்பத் திரும்ப ஒளிபரப்பி டி ஆர் பி ரேட்டிங்கை எகிற வைப்பதில் எதிர்க்கட்சிகளின் நிருபர்களும் களத்தில் இறங்கி இருப்பது வருத்தத்திற்குரியது.கேப்டன் செய்கிற நற்காரியங்கள் அனைத்தும் மக்களிடையே போய் சேருவதில்லை.அவரை இருட்டடிப்பு செய்வதையே தொழிலாக செய்து வருகின்றன ஊடகங்கள்.அதே சமயம் ஏதாவது மாறாக நடந்துகொண்டு விட்டால் போதும் இடைவிடாது ஒளிபரப்புவார்கள்...கட்டிங், ஒட்டிங், எடிட்டிங்லாம் செய்து ஒளிபரப்புவார்கள்...

                தன் கட்சி எம் எல் ஏவை யே அடித்த கேப்டன்.., சட்ட சபையில் நாக்கை துருத்தி பேசிய கேப்டன், உளறிக்கொட்டும் விஜயகாந்த் என்றெல்லாம் வரிந்து கட்டி ஒளிபரப்புவார்கள்....சமீபத்தில் வெள்ள பாதிப்பை வேனில் பார்வையிட வந்த முதல்வர் அவர்களை நெருங்க முடிந்ததா இந்த பத்திரிக்கையாளர்களால்...இல்லை அவர் வானில் ஹெலிகாப்டரில் பறந்த போது இன்னொரு ஹெலிகாப்டரில் அவர் பின்னாடியே பறந்து சென்று செய்திகளை சேகரித்தார்களா?.நிவாரணப் பொருட்களில் ஸ்டிக்கர் ஒட்டுவதை பற்றியும், செம்பரம்பாக்கம் ஏரி பற்றியும் முதல்வர் அவர்களிடம் கேள்விகளை தொடுக்க முடியுமா...

                  பிரதமர் உலகம் உலகமாக சுற்றிக்கொண்டிருக்கிறார் என்பது தெரிந்தும் வெள்ள நிவாரண உதவி, ஜல்லிக்கட்டுக்கு அனுமதி என்று கடிதம் எழுதிக்கொண்டிருக்கிறார். வாட்ஸப்பில் மட்டும் வாய்ஸ் அனுப்புகிறார் மக்களுக்கு..எங்கே மறந்து விடுவார்களோ என்று....

கேப்டன் அவர்கள் சினிமாவில் இருந்தபோதே ஏகப்பட்ட உதவிகள் செய்து கொண்டிருந்தவர்.சிறந்த குடிமகன் விருதை வாங்கியவர்.ஏழை எளிய மக்களுக்கு அதிகம் உதவி புரிந்தவர்.ஆட்சி அதிகாரம் இல்லாதபோதே அத்தனையும் செய்தவர்.அனைத்தும் கிடைத்தால் நிச்சயம் தமிழகத்தில் ஒரு மாற்றம் ஏற்படும்.

                 இப்பொழுது இருக்கும் சூழலில் கேப்டன் எது செய்தாலும் அது நியூஸ் தான்.அவர் செய்து வரும் நற்காரியங்களை தவிர.....பத்திரிக்கைகளிடம் நடுநிலைமை என்பது சுத்தமாக இல்லை...பீப் பாடலுக்கு முக்கியத்துவம் கொடுத்து வெள்ள பாதிப்பு சேதங்களை மறைத்துவிட்டன.இளையராஜா விடம் பேட்டி என்கிற பெயரில் பீப் பாடலுக்கு கருத்து கேட்டு அவரை இன்னலுறச்செய்வது, இதோ இப்பொழுது கேப்டன்....பதிலுக்கு அவரும் சொல்லிவிட்டார்........

த்தூ....ஊடகங்கள்.....

தூள் கேப்டன்.....

இப்போது அமைந்து இருக்கிற கூட்டணி நிச்சயம் ஒரு மாற்றத்தினை கொண்டுவரும்.கேப்டன், வைகோ, திருமாவளவன், ராமகிருஷ்ணன், முத்தரசன் ஆகியோர் நிச்சயம் ஒரு மாற்றாக இருப்பார்கள்.இவர்களின் கூட்டணியால் திமுக, அஇஅதிமுக ஆகிய இருகட்சிகளின் ஊழல்கள் முற்றாக வெளியே வரும்.நல்ல சிறப்பான நிர்வாகத்தினை இவர்கள் அளிப்பார்கள் என்கிற நம்பிக்கை எனக்கு இருக்கிறது.பார்ப்போம் இந்த 2016 ம் ஆண்டின் தேர்தல் முடிவுகளை....

நேசங்களுடன்

ஜீவானந்தம்

  

இன்னும் கொஞ்சம்...

கோவை மெஸ் - சோயா வறுவல், நியூ லட்சுமி மெஸ், மார்க்கெட் பகுதி, ஊட்டி

சோயா வறுவல்

                  நம்ம வேலை ஊட்டியில் நடைபெறுவதால், மாலை நேரங்களில் ஊட்டியில் ஊர் சுற்றுவது வேலை.சில்லென குளிரில் ஜெர்கினை உடுத்தியபடி காலாற நடப்பது சுகம்.ஊட்டி சுற்றுலா பகுதியாதலால் உள்ளூர் மற்றும் வெளிநாடு அம்மணிகள் வேறு அம்சமாய் சுற்றிக்கொண்டிருப்பர்.அது வேறு செம ஜில்லாக இருக்கும்.கார்டன், போட் ஹவுஸ், மார்க்கெட், கமர்சியல் ரோடு, சேரிங்கிராஸ் என முக்கியமான இடங்கள் அனைத்தும் ஊட்டி நகரப்பகுதியில் இருப்பதால் அங்கு எப்பவும் சுற்றுலாவாசிகள் நடமாட்டம் இருக்கும்.கண்ணுக்கு குளிர்ச்சியாக இருக்கும், அதே சமயத்தில் அங்கு நிலவுகிற குளிருக்கு இதமாய் சூடாய் ஏதாவது சாப்பிட்டால் சொர்க்கமே பக்கத்தில் இருப்பது போலிருக்கும்.

                          ஊட்டி குன்னூர் போன்ற மலைப்பகுதிகளில் சோயா பெரும்பாலும் மாலை நேர உணவாக தள்ளுவண்டி கடைகளில் கிடைக்கிறது.சோயா சில்லி,சோயா வறுவல் என விதவிதமாக சாப்பிடுகின்றனர்.குன்னூரில் ரயில்வே கேட் அருகில் ஒருவர் சூடாய் சில்லி சோயா தள்ளுவண்டியில் போட்டுக்கொண்டிருப்பார்..சில்லி சிக்கன் தோற்று போய்விடும்.அவ்வளவு டேஸ்டாக இருக்கும்.ஊட்டி பகுதியில் நிறைய இடங்களில் சோயா உணவுகள் கிடைத்தாலும் ஊட்டி நகர மக்களின் தேர்வு மார்க்கெட்டில் உள்ள ஒரு கடையை சொல்கின்றனர்.

                    அப்படித்தான் இந்தக்கடைக்கு நேற்று சென்றிருந்தேன்.சின்ன கடைதான்.பத்துக்கு பத்து ரூம் தான்.இரண்டு டேபிள்கள் போடப்பட்டு இருக்கின்றன.உள்ளே ஒரு தடுப்பு அறை.அதனுள் சுடச்சுட ரெடியாகி கொண்டு இருக்கிறது சோயா வறுவல்.உள்ளே வருவதும் போவதுமாக ஆட்கள் இருக்க, சிலபேர் உள்ளே உட்கார்ந்து சாப்பிட்டுக்கொண்டிருந்தனர்.அந்த ஜோதியில் நானும் ஐக்கியமானேன்.என்ன சாப்பிடலாம் என்று யோசிக்காமல் அனைவரும் சாப்பிட்டுக்கொண்டிருக்கும் சோயா வறுவலையே நானும் சொன்னேன்.

               சூடாய் ஆவி பறக்க சோயா வறுவலை ஒரு பிளேட்டில் வைத்து சூடு தாங்கிக்கொள்ள ஒரு பேப்பரையும் தர, தட்டினை டேபிளில் வைத்து ஸ்பூனால் சோயாவை இரண்டாக பிய்க்க ஆரம்பிக்க, சூட்டோடு சோயாவின் வாசனை நம் நாசியினை அடைந்து உடனே வளர்சிதை மாற்றம் போல, நாக்கில் எச்சில் ஊற ஆரம்பித்தது.சோயாவை பிய்த்து, சுடச்சுட வாயில் போட்டு மெல்ல, ஆஹா…என்ன சுவை…நாக்கில் உள்ள அத்துணை சுவை நரம்புகளும் எழுந்து நின்று வரவேற்கிறது.காரம், உப்பு, கொஞ்சம் மசாலா என கலந்துகட்டி சுவையை அதிகப்படுத்தியது. சிக்கனுக்கு உண்டான சுவை சோயாவிலும் இருக்கிறது. செம டேஸ்ட்.                   

                    அப்படியே ஒவ்வொன்றாய் பிய்த்து பிய்த்து சாப்பிட்டுக் கொண்டிருக்க, பக்கத்துகாரர் சூப் ஊத்துங்க என்று சொல்லவும், அவரது பிளேட்டுக்கு சூப்பினை சூடாய் சோயாவில் ஊற்றினார் கடைக்காரர்.நானும் என்ன அது என்று கேட்க, காளான் சூப் என சொல்ல, எனக்கும் போடுங்க என்றவுடன் சூடாய் எனது பிளேட்டுக்கும் ஊற்றினார்.வெளியே இருக்கின்ற குளிரில் சோயா ஆறிக்கொண்டிருக்க, சூடாய் சூப் ஊற்றவும் மீண்டும் ஆவி பறக்க ஆரம்பித்தது சோயாவில்.நமக்கும் சூடாய் இருக்க, மீண்டும் சோயா விள்ளல் உள்ளே சென்றது.காளான் சூப்புடன் சோயா வறுவலின் மசாலா ஒன்று சேர அது இன்னொரு சுவையைத் தந்தது.சோயா முழுக்க சாப்பிட்டவுடன் ஒரு வித திருப்தி ஏற்பட, கடைக்காரரிடம் ரொம்ப சுவையாக இருக்கிறது என்று சொல்லிவிட்டு விடைபெற்றோம்….

                   மார்க்கெட் பகுதியில் பழைய அக்ரஹாரம் ரோட்டின் கார்னரில் இருக்கிறது.மிக அருகிலேயே சண்முகா ஒயின்ஸ் இருக்கிறது.குளிருக்கு இதமாய் இரண்டும் அருகருகே இருப்பது சிறப்பு….

விலை குறைவுதான்.ஒரு பிளேட் 20 ரூபாய்.இதே கடையில் சில்லி சிக்கன், ஈரல் வருவல் என நான்வெஜ் அயிட்டமும் இருக்கிறது.

நேசங்களுடன்

ஜீவானந்தம்

இன்னும் கொஞ்சம்...

மலரும் நினைவுகள் : தேர்தல் அனுபவங்கள்

தேர்தல் அனுபவங்கள்

                   என் பால்ய காலம்...அரை டிரவுசர் அணிந்து கொண்டு வெயிலில் அலைந்து திரிந்து கொண்டிருந்த காலம்.ஆரம்பப்பள்ளியில் படித்துக் கொண்டிருந்த காலம்.தேர்தல் அறிவிப்பு வந்தாலே போதும் எங்களது கிராமம் திருவிழாக்கோலம் பூண்டுவிடும்.ஒவ்வொரு கட்சிக்காரர்களும் அவரவர் கொடிக்கம்பங்களை கட்சி பெயிண்ட் அடித்து ஒரு பொதுவான இடத்தில் நட்டு வைத்து கட்சிக்கொடி தோரணங்களை குறுக்கும் நெடுக்குமாக கட்டி தொங்க விடுவர்.கொடிக்கம்பங்களும் அருகருகே இருக்கும்.பொதுவான இடம் என்பது ரோட்டோரப்பகுதி. பிரச்சாரத்திற்கு வரும் முக்கிய தலைவர்கள் வேனில் நின்றபடியே கொடி ஏத்துவார்கள்.

            அதற்காகவே அத்தனை கட்சி கொடி மரங்களும் ஒரு இடத்தில் அருகருகே வைத்து இருப்பார்கள்.ஒரு சில இரண்டாம் கட்ட தலைவர்கள் மட்டும் இறங்கி வந்து கொடி ஏத்துவர்.எங்கள் கிராமத்திற்கு எம்ஜியார் கருணாநிதி தவிர அரசியலில் உள்ள அத்தனை பிரபலங்களும் வந்து இருக்கின்றனர். அரசியல்வாதிகளை விட நடிகர்களை பார்க்கத்தான் கூட்டம் அலைமோதும்.எப்படியும் இரவு நேரத்தில் தான் ஒவ்வொரு கிராமம் கிராமமாக பிரச்சாரம் செய்துவிட்டு வருவார்கள்.அவர்கள் வரும் வரை பிரச்சார பாடல்களுக்கு டான்ஸ் ஆடிக்கொண்டும் விளையாடிக் கொண்டும் இருப்போம்.

                  சிறுவர்களான எங்களுக்கு ஊரிலுள்ள சுவர்களில் கட்சி சின்னங்களை வரைவது தான் பொழுது போக்கு.போதாக்குறைக்கு கட்சிக்காரர்களும் சொல்லிவிடுவார்கள் ரிசர்வ் பண்ணுவதற்கு.நாங்களும் கரிக்கட்டையை எடுத்து சின்னங்களை வரைய ஆரம்பித்து விடுவோம்.எங்களுக்கு அப்புறம் தான் பக்கா ஸ்பெசலிஸ்ட் ஓவியர்கள் வந்து சின்னங்களை வரைந்து வேட்பாளர் பெயர்களை எழுதிவைப்பார்கள்.அதற்கு முன் சுவர்களில் எங்கள் கைவண்ணம்தான்.

                      இப்போது இருக்கிற மாதிரி நிறைய கட்சிகள் அப்போது இல்லை.இருந்திருந்தாலும் தெரிந்து இருக்க வாய்ப்பு இல்லை.இரட்டை இலை, உதயசூரியன் அப்புறம் காங்கிரஸ்.இதுமட்டும் தான் தெரியும். சுயேட்சையாக ஒரு சிலர் நிற்பார்கள்.அவர்கள் அந்த தேர்தலோடு காணாமல் போய்விடுவார்கள்.சட்டமன்ற தேர்தலா இல்லை பாராளுமன்ற தேர்தலா என்று கூட தெரிந்து இருக்க மாட்டோம்.ஆனால் எலெக்சன் என்று வந்துவிட்டால் போதும் எல்லா வகையான சின்னங்களையும் வரைய ஆரம்பித்து விடுவோம்.

                         ஆங்கில எழுத்து M மாதிரி இரண்டு மலையை போட்டு ஒரு வட்டம் போட்டு கதிர்களை வரைந்து விட்டால் உதயசூரியன் ரெடி..அதே மாதிரி இரட்டை இலையும் வரைவது ஈஸிதான்.ஒரு கோடு போட்டு இரண்டு இலைகளை வரைந்துவிட்டால் எம்ஜியார் சின்னம் ரெடி.கை சின்னம் வரைவது கூட மிக எளிதுதான்.கூட இருப்பவனின் வலதுகையை சுவற்றில் வைத்து அவுட்லைன் போட்டு விட்டால் கை சின்னம் ரெடி…

                        இப்படித்தான் கிராமத்தில் இருக்கிற சுவர்களில் கிறுக்கி வைத்துக் கொண்டிருப்போம்.இதிலும் ஒரு சிக்கல் இருக்கிறது.வீட்டுக்காரர் எந்த கட்சியில் இருக்கிறார் என்பதை அறிந்து அந்த  கட்சியின் சின்னத்தினை வரைய வேண்டும்.இல்லையெனில் மாத்து தான்..ஒரு சில வீட்டில் சின்னத்தினை மாற்றி வரைந்து விட்டு கன்னாபின்னா பேச்சுக்களை வாங்கியதும் உண்டு.

                 தேர்தல் பிரச்சாரம் ஆரம்பித்தால் போதும் ஊரெல்லாம் கட்சி கொள்கை பாட்டுகள் ஒலிக்க ஆரம்பித்துவிடும்.அதில் முன்னாடி இருப்பது திமுகவின் நாகூர் ஹனிபாவின் வெண்கலக்குரல் தான்.

கல்லக்குடி கொண்ட கருணாநிதி வாழ்கவே.

ஓடி வருகிறான் உதயசூரியன்…

பாளையங்கோட்டை சிறையினிலே…..பாம்புகள் பல்லிகள் நடுவினிலே….

இப்படி ஓங்கி ஒலித்துக் கொண்டிருக்கும்.அதிகம் முணுமுணுத்துக் கொண்டிருப்பது திமுகவின் பிரச்சார பாடல்களைத்தான்.ஆனால் எம்ஜிஆர் கட்சியைப் பொறுத்தளவு அவரது திரைப்பட பாடல்கள் தான் பிரச்சார பாடல்கள்.எம்ஜிஆரின் பாடல்கள் அது ஒரு தனி ரகம்.நாகூர் ஹனிபா குரல் ஈர்த்த அளவுக்கு எம்ஜிஆரின் பாடல்கள் ஈர்க்கவில்லை.மிகவும் கருத்து செறிந்த பாடல்கள் என்றாலும் அதென்னவோ பிடித்ததில்லை. எம்ஜிஆர் படம் மட்டும் விரும்பி பார்ப்போம்.கத்திச்சண்டை மட்டும் எங்களை இரு நாட்டு அரசர்களைப் விளையாட வைத்துக் கொண்டிருக்கும்.எம்ஜிஆர் சினிமாப் பாடல்கள் ஒலித்தாலும் விரும்பிக் கேட்டதில்லை.ஆனாலும் எம்ஜிஆரின் தனிப்பட்ட செல்வாக்கே அவரை தொடர்ந்து முதலமைச்சர் ஆக்கியது.

                  தேர்தல் நாள் அன்று ஊரே திருவிழாக்கோலம் தான்.ஆங்காங்கே கட்சிகளின் தற்காலிக பந்தல், கொடி மற்றும் தோரணைகளால் அலங்கரிக்கப்பட்டு இருக்கும்.அவரவர் கட்சியின் பிரமுகர்கள் வாக்காளர் லிஸ்ட்டை வைத்துக்கொண்டு பூத் சிலிப் தந்து கொண்டிருப்பர்.நாங்களும் எங்கள் பங்குக்கு நாங்களும் பூத் சிலிப்பில் பேர் எழுதிக் கொடுத்துக்கொண்டு இருப்போம்.எப்பவும் போல ரேடியோ அலறிக்கொண்டிருக்கும்.பாதுகாப்புக்கு ஒரு சில காவல் அதிகாரிகள். வாக்குச்சாவடியை நாங்கள் படித்த பள்ளியிலேயே அமைத்து இருப்பார்கள்.பள்ளிக்கூட பென்ச் நாற்காலிகள் போட்டு நான்கைந்து அரசுப்பணியாளர்கள் அமர்ந்து வரிசையாய் வாக்காளர்களுக்கு சின்னங்களை கொடுத்து உள்ளே ஓட்டுப் போட அனுப்புவர்.விரலில் மை வைத்து ஓட்டு போட்ட பெருமிதத்துடன் வெளியில் வருபவர்களை குத்துமதிப்பாக விசாரித்து கொள்வோம்.

              வீட்டில் உள்ள வயசானவர்கள், நடக்க முடியாதவர்களை தூக்கிக்கொண்டு வாக்குச்சாவடிக்கு கொண்டு வரும் பழக்கம் அன்று முதல் இன்றும் தொடர்ந்து கொண்டு வருகிறது.பக்கத்து ஊர்களுக்கும் சேர்த்து எங்களது ஊரிலேயே வாக்குசாவடி அமைத்து இருப்பார்கள்.அதனால் அந்த ஊர்க்காரர்கள் வேன் வைத்து வாக்காளர்களை கூட்டி வந்து கேன்வாஸ் செய்வார்கள்.வாக்கு தினத்தன்று கூட வாக்குச்சாவடி முன் நின்று வாக்காளர்களிடம் ஓட்டு கேட்டுக் கொண்டிருப்பர் உள்ளூர் கட்சிக்காரர்கள்.உள்ளூரிலேயே ஒரு சில வீடுகளில் பந்தி பரிமாறிக்கொண்டு இருப்பார்கள்.ஓட்டு போட வருபவர்கள் மூக்கு பிடிக்க தின்றுவிட்டு தான் ஓட்டு சாவடிக்கு செல்வார்கள்.

                    வாக்கு போட்டவுடனோ அல்லது போடுவதற்கு முன்போ பதுக்கி வைத்து இருக்கும் சாராயங்கள் வெளிவரும் இவர்கள் போடுவதற்காக.எப்படியோ எதோ ஒரு வகையில் கேன்வாஸ் செய்துகொண்டே இருப்பார்கள்.கொஞ்சம் லேட்டாகிப் போகிறவர்களின் ஓட்டு இன்னும் இருக்குமா என்றால் அது சந்தேகமே….அதற்குள் கள்ள ஓட்டினை குத்தி இருப்பார்கள்.

              சிறுவர்களான எங்களுக்கு வேறு வேலை இல்லை.அங்குமிங்கும் அலைந்து கொண்டே இருப்போம்.எங்களுக்கு பிடித்த கட்சியின் பிட் நோட்டிஸை ஓட்டு போட வருபவர்களிடம் கொடுத்துக் கொண்டிருப்போம்.தேர்தல் முடியும் வரை எங்களுக்கு ஒரே ஜாலியாக இருக்கும்.தேர்தல் முடிந்தவுடன் யார் ஜெயிப்பார் என்று பந்தயம் கட்டுவோம்.என்ன இருந்தாலும் எம்ஜிஆர் தான் ஜெயிப்பார் என்று சொல்கிற அளவுக்கு எங்களுக்கு அவரைப்பிடித்து இருந்தது.அவர் நாட்டு மக்களுக்கு என்ன செய்தார் என்பெதெல்லாம் தெரியாது,ஆனால் எம்ஜிஆரை பிடிக்கும்.

              தேர்தல் முடிந்து ரிசல்ட் வந்தவுடன் அன்று எம்ஜிஆரின் திரைப்படங்கள் எங்கள் ஊர் மைதானத்தில் திரை கட்டி போடுவர்.பாயை எடுத்துக்கொண்டு முன்கூட்டியே இடம்பிடிக்க சென்றுவிடுவோம்.

                  ஆக மொத்தத்தில் சிறுவயதில் தேர்தல் என்பது ஒரு மகிழ்ச்சிகரமான விசயமாகவே எங்களுக்கு தெரிந்தது.அப்படிப்பட்ட தேர்தல் நிகழ்வுகள் இன்று ஒரு சடங்காக ஆகி இருக்கிறது.எங்களை பால்ய காலத்தில் மகிழ்வித்த தேர்தல் இன்று சுத்தமாய் இல்லை.தேர்தல் என்றாலே பணம் கொடுத்து ஓட்டை விலைக்கு வாங்கும் நிலைமைக்கு ஆட்சியாளர்கள் வந்துவிட்டனர்.பணத்தை எதிர்பார்த்து வாக்காளர்களும் மாறிவிட்டனர்.. எண்ணிலடங்கா கட்சிகள் பெருகிவிட்டன. வாக்குசீட்டுக்கு பதில் ஓட்டு மெசின் வந்துவிட்டது. ஆளுங்கட்சி, எதிர்கட்சி என மாறி மாறி ஆட்சியாளர்கள் ஆட்சிக்கட்டிலில் அமர்ந்துவிட்டனர். இலவசங்கள் மட்டுமே நாட்டை ஆளுகின்றன.ஒரு சில நல்லவைகள் நடந்தாலும் நாட்டின் பொருளாதாரம் உயர்கிறதோ இல்லையோ ஆனால் மாறி மாறி ஆளுகின்ற ஆட்சியாளர்களின் பொருளாதார நிலைமை மட்டும் உயர்ந்து கொண்டே இருக்கிறது இன்றைய காலகட்டத்தில்..

நேசங்களுடன்

ஜீவானந்தம்

 

இன்னும் கொஞ்சம்...

கோவை மெஸ் - அடைபிரதமன் , பிரியா பாலடை பாயாசம்,ஜி.பி சிக்னல், கோவை

கேரளாவின் மிக பிரசித்தி பெற்ற ஒரு உணவு அடைபிரதமன்.ஓணம் திருவிழாவில் படைக்கப்படுகிற மிக சுவையான உணவு இந்த அடைபிரதமன்.நம்மூர்ல பண்ற பாயாசம் போல இருக்காது.அரிசி மாவை வேகவைத்து அடை செய்து பின் தேங்காய்பால், பால், சர்க்கரை சேர்த்து செய்யப்படுகிற மிக சுவையான பதார்த்தம் இது...குடிக்க குடிக்க தெவிட்டாத ஒரு வகை உணவு.

கேரளாவில் மட்டும் கல்யாணம் மற்றும் வீட்டு விழாக்களில் இது முக்கியமாய் இடம் பெறும்.நம்மூரில் இது கிடைப்பது அரிதே..ஏதாவது கேரள ஹோட்டல்களில் மட்டும் கிடைக்கும்.நம்மூரில் வசிக்கின்ற மலையாளிகள் வீட்டில் ஏதாவது விசேசத்திற்கு செய்வார்கள்.

                எனக்கு மிகவும் பிடித்த பாயாசம் இது.கேரள நண்பர்கள் வீட்டில் ஏதாவது விசேசம் என்றால் அங்கு ஆஜராகிவிடுவேன்.கடைசியாய் என் நண்பரின் திருமணத்தில் சுவைத்தது.அதற்கப்புறம் வாய்ப்பு கிட்டவில்லை. கடந்த ஒரு சில மாதங்களாகவே மாலை நேரத்தில் நூறடி ரோட்டில் சிக்னலுக்காக வெயிட் பண்ணிக்கொண்டிருக்கும் போது, இந்த பிரியா பாலடை பாயசம் கடை பூட்டியே இருக்கும்.ஆனால் விளம்பர போர்டு மட்டும் நம்மை வரவேற்றுக்கொண்டிருக்கும்.எப்போ திறப்பார்கள் என்கிற விவரம் எதுவும் தெரியவில்லை...இப்படியே ஒரு சில மாதங்கள் ஓடிவிட்டன..
கடைசியாய் இரு தினங்களுக்கு முன் ராமகிருஷ்ணா மருத்துவமனை ஐயப்பன் கோவில் வழியாய் ஜி.பி சிக்னல் வரும் போது அதிசயமாய் திறந்து கிடந்தது.உடனே வண்டியை ஓரங்கட்டி கடைக்குள் நுழைந்து விட்டேன்.

                மலையாள சேச்சி தான் நம்மை வரவேற்றது.அடைபிரதமன் இருக்கான்னு கேட்டதும், ஓ....இருக்கே என தமிழுமலையாளத்தில் பறைஞ்சு, ஒரு டீ கப்பில் ஊற்றிக் கொடுக்க, எடுத்து உதட்டில் வைத்து ஒரு சிப் அருந்த,  ஆஹா....ஆஹா....செம டேஸ்ட்...நாவில் அதன் சுவை பரவ பரவ என்ன ஒரு ஆனந்தம்...பால் பருக பருக, இடையிடையே வரும் அரிசி மாவின் அடை சுவையும் பாலுடன் கலந்து ஒன்றாய் இறங்க அமிர்தம்...... போங்கள்....
கெட்டியான பாலில் நன்கு வெந்திருந்த அடையின் சுவை இன்னமும் நம் நாவில் கலந்திருக்கிறது.ஒரு கப் குடித்து முடித்தவுடன், மீண்டும் இன்னொரு கப்  என ஆட்டோமேடிக்காய் கேட்க ஆரம்பித்தது நம் மனது.இன்னொரு கப் ஊற்றித்தர பொறுமையாய் ரசித்து ருசித்து கொண்டபடியே சேச்சியிடம் சம்சாரிக்க ஆரம்பித்தேன்...
ஏன்  சேச்சி,,,எப்போ பார்த்தாலும் கடை பூட்டியே கிடக்கே..என விளிக்க, இல்லை... இல்லை... காலை  10 டூ 6  தான்...பூட்டிட்டு கிளம்பிடுவேன்.ஆறு மணிக்கு மேல் ஒரு நிமிசம் கூட இருக்கமாட்டேன் என அரசாங்க உத்தியோஸ்தர் ரேஞ்சில் பறைஞ்சது சேச்சி...

            கடையை சுற்றி முற்றி பார்த்ததில் ஏகப்பட்ட ரெடிமேட் வகையறாக்கள்..அதில் இந்த அடைபிரதமனும் இருக்க, எப்படி செய்வது என கேட்க, 3 லிட்டர் பாலில் இந்த ரெடிமேட் அடையை போட்டு குறைந்தபட்சம் மூன்று மணி நேரம் கொதிக்க வைத்து, பாலின் நிறம் மாறினதுக்கு அப்புறம் கொஞ்சம் முந்திரி, ஏலக்காய் போட்டு இறக்கினால் அடை பிரதமன் ரெடி என்றது சேச்சி....
எல்லாம் கேட்டு முடிக்கையில் கப்பில் இருந்த அடைபிரதமனும் காலியாகி இருந்தது.காலையில் வாங்க...நல்லா சூடா இருக்கும் செம டேஸ்டா இருக்கும் என சொல்ல,  அடைபிரதமனுக்கு உண்டான காசினை கொடுத்து விட்டு, ரெடிமேட் பாக்கெட் ஒன்றும் வாங்கிகொண்டு, மீண்டும் வருவேன் என சொல்லிவிட்டு விடைபெற்றேன் சேச்சியிடம்...

வீட்டிற்கு வந்தவுடன், அந்த அடை பிரதமன் பாக்கெட்டில் அரைபாக்கெட் மட்டும் எடுத்து கொஞ்ச நேரம் சுடுநீரில் ஊறவைத்து, பின் 2 லிட்டர் பாலில் போட்டு கொதிக்க வைக்க, இரண்டு மணி நேரம் கழித்து பார்க்க பால் கெட்டியாக, அதில் அடையும் வெந்து இருந்தது.பின் முந்திரி கொஞ்சம் கலந்து பின் சூடாய் ஒரு டம்ளரில் ஊற்றி குடிக்க,, ஆஹா அதே சுவை...கொஞ்சம் கூட மாறாமல்.....பேஷ்...பேஷ்...ரொம்ப நன்னாயிருக்கு....

அடை பிரதமன் ஒரு கப் விலை.20ரூபாய்.ரெட்மேட் பாக்கெட் விலை 45 ரூபாய்.இன்ஸ்டெண்ட் பாக்கெட் விலை 120.
இன்னும் நிறைய வெரைட்டி ரெட்மேட் உணவு பொருட்கள் இருக்கின்றன  இந்த பிரியா பாலடை பாயாச கடையில்..

ஜி.பி சிக்னல் அருகில் உள்ள நியூசித்தாபுதூர் ஐயப்பன் கோவில் அருகில் இந்த கடை இருக்கிறது.கேரள உணவான அடைபிரதமனை ருசிக்கனுமா, 12 மணிக்கு மேல வாங்க...சூடா சாப்பிடலாம்....

நேசங்களுடன்
ஜீவானந்தம்

இன்னும் கொஞ்சம்...

கரம் - 20

கரம்

படித்தது :பு(து)த்தகம்
மெளனத்தின் சாட்சியங்கள் :

கோவையில் இரு அமைப்புகளுக்கு  ஏற்பட்ட மோதலே கொலை, குண்டுவெடிப்பு, கலவரம் என நீண்டு கோவையை சின்னா பின்னமாக்கிவிட்டது.இந்த குண்டுவெடிப்பு நிகழ்வினை நாவலாக காட்சிப்படுத்தி இருக்கிறார் ஆசிரியர்.சிறையிலிருந்து விடுதலையாகும் ஒரு அப்பாவி முஸ்லீம் இளைஞனின் பார்வையில் கதை விரிகிறது.இரு மதங்களின் போர்வையில் நடத்திய ஒரு பயங்கர நிகழ்வு இந்த கோவை குண்டுவெடிப்பு.இதற்கு பலியானது அப்பாவிகள்தான்.கோவைக்கு ஏற்பட்ட தீராத களங்கமும் இந்த குண்டு வெடிப்பினால்தான்.

கோவை பெரிய கடை வீதி, டவுன்ஹால், கோட்டைமேடு, உக்கடம் பகுதிகளில் உள்ள இந்து முஸ்லீம் வியாபாரிகளின் தொழில் போட்டியே இந்த கலவரத்திற்கு காரணம் என்றும் அறியப்படுகிறது..
இந்த கலவரக்காட்சிகளை கண்முன்னே நிறுத்துகிறார் எழுத்தின் வடிவில்..பதபதைக்கிறது படிக்க படிக்க....

பார்த்தது :
2015 இறுதியில் தியேட்டருக்கு சென்று பார்த்த படம் பூலோகம்...
படம் மிக அருமை..ஒரு சேனலின் அதிபருக்கும், குத்துச்சண்டை வீரருக்கும் நடக்கும் யுத்தமே இந்த பூலோகம்...படம் மிக நன்றாக இருக்கிறது...

2016 இல் தியேட்டருக்கு சென்று பார்த்த முதல் திரைப்படம்
தாரை தப்பட்டை...

பாலாவின் அதே டிரேட் மார்க் படம்..செம...சின்ன சின்ன ஹாஸ்யங்களுடன் நன்றாகவே இருக்கிறது.நிறைய விமர்சனங்களை படித்து தொலைத்ததினால் என்னவோ ஹீரோ எப்போ வில்லனின் குரல்வளையை கடிப்பான்......கொல்வான் என்கிற எதிர்பார்ப்பு வந்து தொலைக்கிறது.இனி சத்தியமாய் விமர்சனம் படிக்கவே கூடாது.ஒவ்வொருவருக்கும் ஒரு ரசனை இருக்கிறது.எந்த மாதிரி மனநிலையில் அவன் படம் பார்க்கிறான் என்பதை பொறுத்து படத்தின் வெற்றி தீர்மானிக்கப்படுகிறது.என்னைப் பொறுத்த வரையில் படம் நன்றாகவே இருக்கிறது.அதிக வன்முறை, ஆபாசம் என்பதெல்லாம் இல்லை.எங்கள் ஊரில் குறவன் குறத்தி ஆட்டம் ஆடுவார்கள்.அது இன்னும் மோசமாக இருக்கும்.இந்தப்படத்தில் அப்படி ஒன்றும் ஆபாசம் இல்லை.

பாலாவின் ட்ரேட்மார்க் சோடை போகவில்லை.

ருசித்தது:

பனங்கிழங்கு:

நம்ம தோட்டத்துல விளைஞ்சது....

இப்போது பனங்கிழங்கு அரிய பொருள் ஆகிக்கொண்டு வருகிறது.பனைமரம் அழிப்பு காரணமாக இது அதிகம் கிடைப்பது இல்லை...தென்மாவட்டங்களில் ஒரு சில இடங்களில் இது கிடைக்கிறது.

பனஞ்சீம்பு..

கிழங்கை தோண்டி எடுக்கும் போது அதனுடன் உள்ள கொட்டையை இரண்டாக வெட்டினால் அதில் சீம்பு கிடைக்கும்.சாப்பிட சுவையாக இருக்கும்.இதுவும் மிக அரிதான மருத்துவ குணம் வாய்ந்த பொருள்...சாப்பிட்டுப்பார்த்தால் கொஞ்சம் இனிப்பும், உப்பும் கலந்த மாதிரி இருக்கும்.ஒவ்வொரு ஊரில் ஒவ்வொரு பெயரை சொல்கிறார்கள் இதற்கு.

நேசங்களுடன்
ஜீவானந்தம்

இன்னும் கொஞ்சம்...

கோவை மெஸ் - போஸ்ட் ஆபிஸ் கேண்டீன் (சைவம்), R.S.புரம், கோவை

ஒரு வேலை விஷயமா R.S புரத்துக்கு காலையில் கொஞ்சம் நேரத்திலேயே கிளம்பிட்டேன்.மணி 9 ஆகவும் லேசா பசிக்க ஆரம்பித்தது.இந்நேரத்துக்கு எங்கயும் நான்வெஜ் கிடைக்காது.சைவம் தான் எங்க போனாலும் கிடைக்கும்.ரொம்ப சிம்பிளா சாப்பிடலாமே அப்படின்னு நினைக்கையில் உடனடி ஞாபகம் வந்தது போஸ்ட் ஆபிஸ் கேண்டீன் தான்.பத்து வருசம் முன்னாடி சாப்பிட்டது.ஒரு கையேந்திபவனா ஆரம்பிச்ச கேண்டீன் இன்னிக்கு செல்ப் சர்வீஸ் அளவுக்கு வளர்ந்து நிக்குது...

ரொம்ப இடவசதியோட, நல்லா வச்சி இருக்காங்க....பில் போட்டவுடன் வேணுங்கிறத சூடா சாப்பிட்டுக்கலாம்...எல்லாம் சுடச்சுட கிடைக்கும்...வாளி நிறைய சாம்பார், சட்னின்னு நிறைச்சு வச்சிருக்காங்க...

விலையும் ரொம்ப குறைவாகத்தான் இருக்கு.அளவும் அதிகமாகத்தான் இருக்கு...டேஸ்ட்டும் நன்றாக இருக்கு..

நான் காலையில் ராகி தோசையும், ஒரு பொங்கலும் வாங்கிச்சாப்பிட்டேன்...சாம்பாரும், சட்னியும், கார சட்னியும் செம காம்பினேசன்.இரண்டையும் குழைச்சு அடிக்க ஆரம்பிச்சது...வயிறு நிறைந்தபோது தான் தெரிகிறது அதிகமா சாப்பிட்டு விட்டோனோ என்று....

வடை, போண்டா, தயிர்வடை, டீ, காபி, என எல்லாம் இருக்கிறது.மதியம் மினி மீல்ஸ் முதல் வெரைட்டி ரைஸ் வரை அனைத்தும் கிடைக்கிறது...

விலை மிக குறைவுதான்.ஒரு ராகி தோசை 12 மட்டுமே, பொங்கல் 20 மட்டுமே.சப்பாத்தி 5 ரூபாய்..டேஸ்ட் நன்றாக இருக்கிறது.

R.S.புரத்தில் போஸ்ட் ஆபிஸ் காம்பவுண்ட் உள்ளே இருக்கிறது.அந்தப்பக்கம் போனா சாப்பிட்டு பாருங்க....

மாலை நேரம் போனிங்கன்னாஅம்மணிகள் புடைசூழ சாப்பிடலாம்

நேசங்களுடன்

ஜீவானந்தம்

இன்னும் கொஞ்சம்...

இனிய பொங்கல் நல்வாழ்த்துக்கள்

வணக்கம்....

ரொம்ப நாளாகவே இந்த பக்கம் வரமுடிவதில்லை.ஓயாத வேலைப்பளு வேறு.நிறைய பதிவுகள் எழுத வேண்டும் என்று நினைப்பதோடு சரி.கால நேரம் ஒத்துழைப்பதில்லை.மற்றவர்களின் பதிவுகளையும் படிப்பது அரிதாகிவிட்டது.இனி தொடர்ந்து வாசிப்பை, எழுதுவதை அதிகரிக்க வேண்டும்.

கடந்த வருட தவறுகள் இந்த வருடத்தில் ஏற்படாமல் பார்த்துக் கொள்ளவேண்டும்.இந்த வருடத்தை அணு அணுவாய் ரசித்து இன்புறவேண்டும் என்கிற ஒரே ஆவல் தான் இருக்கிறது.

இந்த வருடத்தில் முதல் தொடக்கமே ஒரு சோக நிகழ்வு தான்.மிக நெருங்கிய நண்பரின் தாயார் திடீரென்று காலமாகிவிட்டார்.தாயாரின் இறுதிச்சடங்கில் கலந்து கொள்ள கள்ளக்குறிச்சி வரை பயணமானேன்.இந்த வருடத்தின் முதல் பயணம் சோகத்துடனே ஆரம்பித்து இருக்கிறது...இனி வருபவை அனைத்தும் நல்லவையாக இருக்கட்டும் என நம்புவோம்....

அனைவருக்கும் இனிய பொங்கல் நல்வாழ்த்துக்கள்.அப்புறம் தாமதமான புத்தாண்டு நல்வாழ்த்துக்கள்....

தை பிறந்தால் வழி பிறக்கும்...

நேசங்களுடன்

ஜீவானந்தம்

இன்னும் கொஞ்சம்...