தர்பார் அப்டேட்ஸ் - சூப்பர் ஸ்டார் ரஜினிகாந்த்

இன்று வெளியான தலைவரின் தர்பார் முதல் நாள் முதல் காட்சி கே,ஜி சினிமாஸில் பார்த்தேன்.

             

பக்கா மாஸ் மசாலா படம்.படம் முழுக்க ரஜினியின் ஸ்டைல்தான்.கதை என்று பார்த்தால் ஒரே ஒரு ஒன் லைன் தான்.ஆனால் ரஜினியின் ஸ்டைல், ஆக்சன், காமெடி, சென்டிமென்ட் என அனைத்தும் படத்தை பரபரவென சுவாரஸ்யமாக்குகிறது.நயன்தாரா கொள்ளை அழகு.ஊறுகாயாய் இருக்கிறார் படத்தில்.நிவேதா தாமஸ் அழகோ அழகு.அவருக்கு ஸ்கோப் அதிகமாக இருக்கிறது.யோகிபாபு அவ்வப்போது கவுண்டரடிக்கிறார்.காதைக் கிழிக்காத அனிருத்தின் இசை, சும்மா கிழி பாடல் மிரட்டுகிறது.இயக்குநர் முருகதாஸ் எங்கே போனார் என தெரியவில்லை.ஆனால் படம் போரடிக்காமல் செல்கிறது.

இவ்வாண்டின் முதல் அதிரிபுதிரி வெற்றிப்படம்.

தர்பார் அப்டேட்ஸ் - 1

                 என் பையன் இரண்டாவது படிக்கிறான்.ரஜினியின் வெறித்தனமான ரசிக வாண்டு.தர்பார் டீசர், ட்ரைலர், பாட்டு என ஒவ்வொன்றையும் பல முறை பார்த்து எப்போ 9 ம் தேதி வரும் என ஆவலோடு காத்திருந்தவன் இன்று முதன் முறையாய் FDFS அதிகாலை நேரம், ஆரவார கூச்சல்கள், கைதட்டல்கள், விசில்கள், பட்டாசு, மேள தாளங்கோடு இன்று தலைவரின் தர்பாரை ரசித்து விட்டான்.படம் முடியும் வரை இமை கொட்டாமல் ரசித்து பார்த்தவன், படம் முடிந்தவுடன் அப்பா, இந்த படத்தை எனக்கு மொபைலில் ஏத்திக் கொடுப்பா என்கிறான்.காரில் அமர்ந்தவுடன் சும்மா கிழி பாட்டை போடுப்பா ங்கிறான்..

இதை விட பெரிய விசயம்..அவன் நேற்று பள்ளிக்கு செல்லும் முன், "நாளைக்கு தர்பார் படத்துக்கு போறதால் லீவ் சொல்லனும்..நான் நாளைக்கு எனக்கு காய்ச்சல் அப்படின்னு சொல்லிட்டு வந்துறவா " என கேட்டான் பாருங்க..

அய்யோ சாமி...

ஒரு ரசிகன் உருவாகிறான்...

தர்பார் அப்டேட்ஸ் - 2

வியாழக்கிழமை ஷீரடி சாய்பாபாவை தரிசனம் செய்வர்.இன்று தலைவரை தரிசித்திருக்கிறோம்.தர்பார்..பத்து பேட்டைக்கு சமம்.படம் முழுக்க முழுக்க தலைவரின் தர்பார்தான்.ஸ்டைல் மன்னன்.ரஜினியின் ஒவ்வொரு அங்க அசைவுமே ரசிக்க வைக்கிறது.படம் செம ஹிட்.கண்டிப்பாய் அனைவருக்கும் பிடிக்கும்.

தர்பார் அப்டேட்ஸ் - 3

அன்றும் இன்றும் என்றும் ஒரே சூப்பர் ஸ்டார்தான்.. பக்கா மாஸ்.தலைவரின் துள்ளலான ஸ்டைல் செம..நயன்தாரா அழகோ அழகு...வயசானாலும் சிங்கம் சிங்கம் தான்..

நேசங்களுடன்

ஜீவானந்தம்.

இன்னும் கொஞ்சம்...

பயணம் - கோவை - கடற்கரை -கேரளா - சுற்றுலா

              கோவை நகரம் மலைகள் நிறைந்த ஒரு மாநகரம்.கடலும் கடற்கரையும் தவிர மற்ற நீர் நிலைகளான வாய்க்கால், குளம், ஆறு, அருவி என அனைத்தும் இருக்கிற ஊரும் கூட.கோவையில் இருந்து தமிழகத்தில் உள்ள கடல், கடற்கரைக்கு செல்வது என்பது வெகு தொலைவில் இருக்கும் உலகின் நீளமான இரண்டாம் கடற்கரையான மெரினா பீச் இருக்கும் சென்னை, கடைக்கோடியின்  கன்னியாகுமரி மற்றும் வேளாங்கன்னி இப்படி தூரம் உள்ள இடங்களுக்கு தான் செல்ல வேண்டும்.ஆனால் மிக அருகில் உள்ள கடற்பகுதி எதுவென்றால் கேரளாவின் அரபிக்கடல் தான்.

           திருச்சூரில் இருந்து ஆரம்பிக்கிறது கேரளாவின் அரபிக் கடற்கரையோரம்.திருச்சூரில் இருந்து 20 கிமீ தொலைவில் வாடனாபள்ளி பீச் இருக்கிறது.மிக அமைதியான எந்த ஒரு வணிக விளையாட்டுகளும், ஹோட்டல்களும் இல்லாத ஒரு கடற்கரை கிராமம்.தென்னைகள் நிறைந்த இந்த கிராமத்தில் ரோட்டை ஒட்டியே இந்த பீச் இருக்கிறது.மிகவும் சுத்தமாக இருக்கிறது.ஆட்கள் நடமாட்டம் அதிகமின்றி இருக்கிறது.ஆர்ப்பரிக்கும் அலைகளை கண்டவுடன் மனம் குதூகலமாகிறது.கடல் குளிப்பதற்கு ஏதுவாக இருக்கிறது.ஆனால் குளித்து முடித்தவுடன் நல்ல தண்ணீரில் குளிக்கவும், உடைகளை மாற்றவும் வசதிகள் இல்லை.திருச்சூரில் அறை எடுத்து தங்கி இருந்தால் அங்கு சென்று மாற்றிக்கொள்ளலாம்.இன்னும் வணிக மயம் ஆகாமல் இருப்பதால் மிகவும் சுத்தமாக இருக்கிறது.உள்ளூர் மக்களுக்கு ஒரு பொழுது போக்கு இடமாக இருக்கிறது.

               திருச்சூரை அடுத்து உள்ள குருவாயூரில் சாவக்காடு பீச் இருக்கிறது.இங்கே மீன் பிடித்தல் அதிகம் நடைபெறும் இடமாகும்,கடற்கரை ஓரங்களில் எப்பவும் பெரிய பெரிய மீன்பிடி படகுகள் நிறுத்தப்பட்டிருக்கும்.சுற்றுலாவாசிகளும் அதிகம் குவிந்து இருப்பர். குருவாயூர் கோவிலுக்கு வந்தவர்கள் ஒரு எட்டு இந்த பீச்சிற்கும் போய்ட்டு வருவர்.இந்த இரண்டு கடற்கரைக்கும் கோவையில் இருந்து செல்ல அதிகபட்சம் நான்கு மணி நேரம் மட்டுமே பிடிக்கும்.அதுவும் வாடனாபள்ளி பீச் மிகவும் அருகில் இருப்பதால் மூன்று மணி நேரத்திற்குள் சென்று விடலாம்.இங்கிருந்து கேரள வரைபடத்தின் மேலும் கீழுமாய் பரந்து விரிந்த அரபிக்கடலின் கடற்கரை ஓரங்கள் இருக்கிறது.

                   இதை அடுத்து எர்ணாகுளத்தில் உள்ள செராய் பீச் தான்.இது மிகவும் வணிக மயமாக்கப்பட்ட ஒரு சுற்றுலாத்தலம்.முழுக்க முழுக்க சுற்றுலாப்பயணிகளை கொண்டே இயங்குகிறது.தங்குவதற்கு ஏற்ற அனைத்து வசதிகளும் இங்கே இருக்கின்றன. கோவையில் இருந்து ஐந்து மணி நேரத்திற்குள் சென்றுவிடலாம்.இங்கிருந்தும் கூட கொச்சின் நகரத்திற்கு சென்று விடலாம்.கொச்சினில் இருந்து ஃபோர்ட் கொச்சின் செல்லலாம்.இது முழுக்க முழுக்க ஒரு தீவு என சொல்லலாம்.கடலால் சூழ்ப்பட்ட ஒரு நகரமாய் இந்த ஃபோர்ட் கொச்சின் இருக்கிறது.

                      கோவையில் இருந்து ஒரு நாள் சுற்றுலாவாக கேரளாவின் கடற்கரை பகுதிகளுக்கு செல்லலாம்.நல்ல மீன் உணவுகளை உண்டு விட்டும் வரலாம்.கேரளாவில் தங்கி இன்னும் பல இடங்களை பார்க்க முடியுமென்றால் தாராளமாக முடியும்.கொச்சின் மட்டும் எனில் சாலக்குடியில் உள்ள அதிரப்பள்ளி அருவி, கோவில்கள், படகு பயணம் என அனைத்தையும் அனுபவித்து வரலாம்.கேரளாவின் ஒவ்வொரு மாவட்டமும் ஒரு சிறப்புகளை கொண்டிருக்கிறது,ஒட்டு மொத்தமாய் நல்ல உணவு, பயணம் மேற்கொள்ள கேரளா எப்பவும் சிறப்பு.

கேரளாவின் பிரசித்தி பரோட்டாவும் பீஃப்கறியும் தான்.சுவைக்க சுவைக்க நாவூறும்..

நேசங்களுடன் 
ஜீவானந்தம்          

இன்னும் கொஞ்சம்...

கோவை மெஸ் - கீர்த்தனா மெஸ், சூலூர், கோவை; KOVAI MESS - KEERTHANA MESS, SULUR, COIMBATORE

இனிய புத்தாண்டு நல்வாழ்த்துக்கள்.

கீர்த்தனா மெஸ்:

          கோவையில் இருந்து சூலூர் செல்லும் போது RVS கல்லூரி குமரகோட்டம் தாண்டி செல்கையில் வலது புறம் சைவம் அசைவம் என தனித்தனியாக இந்த ஹோட்டல் இருக்கிறது. ஒரு மாதத்திற்கு முன்பு இந்த ஹோட்டலில் நுழைந்து விட்டோம் ஒரு மதிய நேரத்தில்.வாஷ்பேசினில் கையை கழுவிவிட்டு டேபிளில் அமர, எப்பவும் போல பெரிய சாப்பாட்டு இலையை போட்டுவிட்டு என்ன சாப்பிடுகிறீர்கள் என கேட்க, சாப்பாடு, குடல் கறி என நாங்க சொல்ல, அவர் சொன்னது என்னவோ எல்லாம் சைவ அயிட்டங்கள்.வெஜ் மீல்ஸ், தயிர், தக்காளி, வெரைட்டி மீல்ஸ் என சொல்ல, ஏங்க….ஒரு ஆம்லேட்டாவது கிடைக்குமா என வினவ, இது சைவ ஹோட்டல்ங்க என அவரு சொல்ல, வெளியில் அசைவம் போட்டு இருக்கே என கேட்க, அது பக்கத்து ஹோட்டல் என சொல்ல, அங்க எல்லாம் கிடைக்குமானு கேட்க, அவரும் மொத்தமாய் தலை அசைக்க, இலையை போட்டது போட்டபடி விட்டு விட்டு, பக்கத்து வழியாய் அந்த ஹோட்டலுக்கு தாவினோம்.ஹோட்டலுக்குள்ளேயே வழி இருக்கிறது இரு ஹோட்டலுக்கும்.

        இங்கே வந்தமர்ந்து சாப்பாடு, குடல் கறி ஆர்டரிட்டோம்.இலையை வைத்து சாப்பாடு போட்டு, பொரியலாய் சிக்கன் பிச்சுபோட்ட கறியும், இரத்தப்பொரியலும் வைக்க, அதிசயத்து போனோம்.இரண்டும் முதன் முறையாக அசைவ சாப்பாட்டுக்கு பொரியலாய் பார்க்கிறேன்.சிக்கன் பொரியல் இருக்கே...அது செம..சூடான சாதத்திற்கு மட்டன் குழம்பு முதலில் ஊற்ற, கொஞ்சம் பிசைந்து வாயில் வைக்க, அப்படியே அதன் சுவையில் மெய் மறந்து போனோம்.திருவிழாவிலோ, அல்லது வீட்டு விசேசங்களிலோ ஆட்டுக்கொழுப்பு  மிதக்க மிதக்க எலும்பு குழம்பு ஊற்றுவார்களே….அந்த மாதிரி மிக சுவையாய் இருக்கிறது.இலையில் குழம்பு ஓட, அதை சோற்றை போட்டு அணை கட்டி, வழித்து உறிஞ்சி சாப்பிடுவோமே, அந்த மாதிரி இருக்கிறது.அந்த அளவுக்கு சுவையோ சுவை.குழம்போடு இரண்டு கறித்துண்டுகளும் இருப்பது மிகச்சிறப்பு.

               முதலில் வைத்த சாப்பாட்டுக்கு மட்டன் குழம்பே போதும் என்கிற அளவிற்கு சாப்பிட்டவுடன், மீண்டும் மறுசாதம் வாங்க....அதற்கு நாட்டுக்கோழிக் குழம்பு.இதுவும் நன்கு சுவையாய் இருக்கிறது.குழம்பு நன்கு மணத்துடன், திடத்துடன் இருக்கிறது.சுவையும் மிக சூப்பராக இருக்கிறது.இந்த குழம்பு ஊற்றும் போதும் நாட்டுக்கோழி துண்டுகளை போகிற போக்கில் அள்ளிப்போட்டுச் செல்வது மிக மிக சிறப்பு.

                  வைத்த மறுசாதம் நாட்டுக்கோழி குழம்புக்கு தீர்ந்து போனதால், அடுத்தது மீண்டும் மறு சாதம் வைக்க, அதற்கு மத்தி மீன் குழம்பு.....இந்த மீன் குழம்பும் இரண்டு மத்தி மீன்களோடு ஊற்றுவது மிகவும் சிறப்பு.நல்ல கெட்டியாக மீன் குழம்பு இருக்க, சாதத்தில் பிசைந்து சாப்பிட மிக சுவையாய் இருக்கிறது.அரைத்து வைத்த தேங்காயோடு புளி சேர்த்து நன்கு காரசாரமாய் மீன் குழம்பு சாப்பிட சுவையாய் இருக்கிறது.

                 அடுத்து தக்காளி ரசம்.இது ஏ ஒன் ரகம்.நன்கு காரசாரமாய் அசைவ குழம்புகளை சாப்பிட்டு பின் கொஞ்சம் சாதம் வாங்கி இந்த ரசத்தினை ஊற்றி சாப்பிட்டால் போதும், அவ்வளவு இதமாய் இருக்கிறது. நிறைந்து போன வயிற்றில் இருக்கும் மிச்ச மீதி இண்டு இடுக்குகளிலும் போய் நிறைவது மிகச் சிறப்பு.அடுத்து மோர் இருந்தாலும் வயிற்றில் இடம் இல்லாத காரணத்தால் தவிர்க்கப் படும் போது கொஞ்சம் மனம் கனக்கிறது.இருந்தாலும் ரசத்தினை ஒரு கிண்ணியில் வாங்கி குடிப்பது சூப்பராக இருக்கிறது.

                   மனதும் வயிறும் நிறைந்து வெளியில் வருவது சுகமாய் இருக்கிறது.இப்படித்தான் அன்று எதேச்சையாக போய் சாப்பிட்டதில் இந்த ஹோட்டலின் சுவை அருமை தெரிய வந்தது.அதற்கு அப்புறம் அந்தப்பக்கம் செல்லும் வாய்ப்பு கிடைக்கும் போதெல்லாம் மதிய நேரம் செல்வது போல அமைத்துக்கொண்டேன்.அப்படித்தான் கிட்டத்தட்ட ஒரு மாத காலத்திற்குள் நான்கைந்து முறை சாப்பிட நேர்ந்தது.சாப்பிட்ட அத்தனை தடவையும் அதே சுவைதான்.

                 அந்த சிக்கன் பொரியல் இருக்கிறதே இதுவரை தமிழகத்தில் எங்குமே சாப்பிட்டதில்லை.சிக்கனை நன்கு உதிரி உதிரியாக நீளவாக்கில் பிய்த்து அதில் மசாலாக்கள் சேர்த்து நன்றாக செய்திருக்கிறார்கள்.எப்படி இப்படி சிக்கனில் ஒரு பொரியலை சுவைபட செய்திருக்க முடியும் என ஆச்சரியமாய் இருக்கிறது.சுவையும் சூப்பராக இருக்கிறது.என்ன அளவாய் ஒரு சின்ன பொரியல் பாத்திரத்தில் வைக்கிறார்கள்.இரத்தப்பொரியலும் நன்றாகவே இருக்கிறது.

                     குழம்பு வகையறாவில் மட்டன் குழம்பை சுவையில் அடித்துக்கொள்ளவே முடியாது. அந்தளவிற்கு சுவை.கொழுப்பு மிதக்க மிதக்க குழம்பினை சுடுசாதத்தில் ஊற்றி பிசைந்து சாப்பிடுவது ஒரு தனி சுவை.வீட்டின் கைப்பக்குவம் இதில் தனியாய் தெரிகிறது.

                எல்லாம் சாப்பிட்டு விட்டு பில் வந்தால் ஒரு சாப்பாடு ரூ.80 மட்டுமே.மிக சுவையான தரமான சம்பவம்.மூன்று வகை அசைவ குழம்பு, இரண்டு அசைவ பொரியல், அன்லிமிட்டடு சாப்பாடு, ரசம், மோர்  இந்த விலையில் கிடைப்பது மிக ஆச்சரியமாக இருக்கிறது.

                     சாப்பாட்டோடு சைடு டிஷ் ஆக குடல் கறி, சிக்கன், காடை என அனைத்தும் கிடைக்கிறது,ஆனால் சாப்பாடே மிகச் சிறப்பாய் இருப்பதால் இந்த சைட் டிஷ்கள் தேவைப்படாததாக இருக்கிறது.இது மதிய நேரத்திற்கு மட்டுமே.

                  நன்கு புல் கட்டு கட்டக்கூடியவர்களுக்கு இந்த ஹோட்டல் ஒரு சிறந்த வரப்பிரசாதம்.அந்தப்பக்கம் போனீங்கன்னா ஒரு கை பாருங்க…சாரி…ஒரு வாய் பாருங்க...சுவைக்கு நான் கேரண்டி….

                கோவையில் இருந்து சூலூர் செல்லும் போது பாப்பம்பட்டி பிரிவு தாண்டினால் RVS கல்லூரி, குமர கோட்டம் தாண்டி செல்லும் போது, வலது புறம் இருக்கிறது இந்த ஹோட்டல்.சைவம் அசைவம் என இரு ஹோட்டல்கள் இருக்கின்றன. மதிய நேரத்தில் ஹோட்டல் கொஞ்சம் பிசியானதாக இருக்கும்.டேபிள்கள் ஏழு தான் இருக்கின்றன.ஆனால் சர்வீஸ் நன்றாகவே இருக்கிறது. 

நேசங்களுடன்

ஜீவானந்தம்.

  

இன்னும் கொஞ்சம்...

கரம் - 36

விநாயகர் சதுர்த்தி 

                             எங்கள் ஏரியாவில் நண்பர் ஒருவர் பணம் வசூல் செய்து விநாயகர் சிலையெல்லாம் வைத்து விநாயகர் சதுர்த்தி விழாவை மிகச் சிறப்பாக நண்பர்கள் மற்றும் அந்த ஏரியா மக்களோடு கொண்டாடினார்கள்.இந்த விழாவின் செலவுத் தொகையை அவரிடம் கேட்ட போது மொத்த செலவு 138000 ஆனதாம்.அவரது தெருவிற்குட்பட்ட பகுதியில் மட்டும் இந்த தொகை.இது ஒவ்வொரு ஏரியாவிற்கும் சிலையின் வடிவம், டெகரேசன் மற்றும் வாணவேடிக்கை இவைகளை பொறுத்து விலை மாறும்.கோவையில் மட்டும் 1500 க்கும் மேற்பட்ட சிலைகள் கரைக்கப்பட்டிருக்கின்றன.(இன்னும் மொத்த எண்ணிக்கை தெரியவில்லை).

இவைகளின் ஒட்டு மொத்த மதிப்பினை நீங்களே தெரிந்து கொள்ளுங்கள்.தண்ணீரில் கரைந்து போன தொகையின் மதிப்பை கண்டால் கண்ணீரே வந்து விடும்.தண்ணீரில் கரைவது மட்டுமல்லாமல் சுற்றுப்புறம் மாசு அடைவதும் உண்மைதான்.

                  இவ்வளவு செலவு பண்ணி நகரை பரபரப்பிற்குள்ளாக்கி, சுற்றுப்புற சூழலையும் மாசுபடுத்தி, மக்களை நெரிசலில் அல்லல்பட வைக்கும் விழாவினை கொஞ்சம் மாற்றி செய்யலாமே..

உங்கள் தெருவில் வசூல் செய்த பணத்தில் சின்னதாய் ஒரு விநாயகர் போதும்.அதுவும் களிமண்ணால் செய்ததாய் இருக்கட்டும்.

அந்த தெருவில் உள்ள பள்ளி (அ) கல்லூரி செல்லும் யாருக்காவது, கல்வி உதவியை அளியுங்கள்.

ஏழைப் பெண்களின் திருமணத்தை நடத்தி வையுங்கள்.

மாற்றுத்திறனாளிகள் யாராவது இருப்பின் அவர்களுக்கு கை கொடுங்கள்.

முடியாமல் இருக்கும் மக்களுக்கு மருத்துவ உதவியை அளியுங்கள்.

உங்கள் தெருவினை சுத்தப்படுத்திக் கொள்ளுங்கள்.

மருத்துவ முகாம் அமைத்து நோய்களை கண்டறிந்து குணமாக்க உதவி புரியுங்கள்.

விநாயகர் பெயரைச் சொல்லி அன்னதானம் செய்யுங்கள்.

அரசாங்கம் செய்து தராத வேலைகளை இந்த தொகையில் செய்து கொள்ளுங்கள்.

இப்படி ஒவ்வொரு ஏரியாவும் செய்தால் ஒட்டு மொத்த ஊரும் நன்றாக மாறிவிடும்.இப்படி எவ்வளவோ செய்யலாம்.

மூன்று நாட்கள் தெய்வமாய் வணங்கிவிட்டு, பின் அதை சித்ரவதை செய்து தண்ணீரில் மூழ்கடிப்பதை எங்ஙனம் ஏற்றுக்கொள்வது.ரசாயன கலவைகளால் குளங்கள் ஏரிகள் ஆறுகள் கடல் மாசு அடைவதையும் தவிர்க்கலாமே.

அடுத்த வருடமாவது சிக்கனத்தை கடைப்பிடியுங்கள்.

ஊர் கூடி தேர் இழுங்கள். நாமும் சுத்தமாவோம்.நாடும் சுத்தமாகும்.

உங்கள் பக்தி என்பது நாட்டின் நலனிலும் இருக்கட்டுமே.

இன்னும் கொஞ்சம்...

பு(து)த்தகம் - நான் ஷர்மி வைரம் ( A), 24 சலனங்களின் எண்

பு(து)த்தகம் 

நான் ஷர்மி வைரம் ( A)

நாவலுக்கு A சர்டிஃபிகேட் கொடுத்தமைக்காகவே எழுத்தாளர் கேபிள் சங்கருக்கு வாழ்த்துக்கள்.

                      சாதாரண வைர கொள்ளை கடத்தல் தான் நாவலின் கரு.ஆனால் அதை மிகவும் ரசிக்கும் படியாய் காமத்தோடு கதையையும் எழுதியிருப்பது தான் மிக சிறப்பு.1998 - 2000 வாக்கில் எப்பொழுதோ கேள்விபட்டிருக்கிறேன் கோவாவில் ஆண் ஐட்டங்கள் நிறைய பேர் இருக்கின்றனர்.வெளிநாட்டினரோடு செக்ஸ் வைத்துக் கொண்டு பணமும் மகிழ்ச்சியையும் பெறுவர் என்று.அவர்களின் பெயர் ஜிகிலோ என்று இன்றைக்குத் தான் அறிந்து கொண்டிருக்கிறேன்.சென்னையில் இதற்கென ஒரு கூட்டமே இயங்கி வருவதை கண்டு மனம் அதிசயமும் ஆச்சர்யமும் அடைகிறது.கேபிள் சங்கர் தன் வசீகர எழுத்தில் இவர்களின் செயல்பாடுகளை அக்குவேறு ஆணிவேறாக எழுதி இருப்பதை பார்க்கும் போது கதை தானே என்று ஒதுக்கி வைக்க முடியவில்லை.

              

               மிகவும் டிடெய்ல்டு ஆன நாவல்.கதையும் விறுவிறுப்பாகவே செல்கிறது.நான் என்கிற ராஜன், ஷர்மி என்கிற பெண், வைரம் என்கிற ஆள் அல்லது வைரக் கடத்தலாகவும் எடுத்துக் கொள்ளலாம்.மூவரையும் தனித்தனியாய் விவரித்துக் கொண்டு ஒற்றைப் புள்ளியில் இணைத்து பின் கதையை ஆச்சர்யத்தோடு முடிப்பது ஒரு திரைப்படத்தை பார்த்த மாதிரி இருக்கிறது. ணக்கார பெண்களின் லைஃப்ஸ்டைல், அவர்களின் மறுபக்கம் ஆச்சர்யத்தை ஏற்படுத்துகிறது.சரோஜாதேவி புக் கொஞ்சம் அப்பட்டமாய் இருக்கும்.

                               ஆனால் இதில் பூசி மெழுகப் பட்டிருக்கிறது.படிக்க ஒன்றும் விரசமாய் தெரிவதில்லை அதான் இந்த நாவலின் சிறப்பம்சம்.காதல் காமம் துரோகம் என எல்லாம் கலந்து கட்டி, படிக்க படிக்க மிக சுவாரஸ்யத்தை தந்திருக்கிறார் எழுத்தாளர்.புத்தகத்தை படிக்க ஆரம்பித்து முழுவதும் முடிக்கும் வரை பல ஆச்சர்யங்களை தந்து கொண்டே இருக்கிறது.செம இண்டரஸ்டிங்.

24 சலனங்களின் எண்

                          ஒரு சினிமா என்பது இரண்டரை மணி நேரம் மட்டும் தான்.ஆனால் அதை சரியான திட்டமிடலுடன் பலரது உழைப்பின் காரணமாக 35 நாட்களுக்குள் எடுப்பவர்களும் இருக்கிறார்கள்.மூன்று வருடத்தில் எடுப்பவர்களும் இருக்கிறார்கள்.

படத்தினை முடிக்க முடியாமல் திரைக்கே கொண்டு வராதவர்களும் இருக்கிறார்கள்.

திரைக்கு வந்த படத்தினை மட்டும் நாம் சிலாகிக்கின்றோம்.திரைக்கு பின்னால் இந்த திரைப்படம் எப்படியெல்லாம் உருவாக்கம் பட்டிருக்கும் என்று நினைப்பது இல்லை.இந்த நாவல் அதைத்தான் சொல்லுகிறது. 

                    திரையுலகின் கறுப்பு பக்கத்தினை தெளிவாய் சொல்லி இருக்கிறார் நாவலாசிரியர்.ஒரு திரைப்படம் என்னென்ன இடர்களால் பாதிக்கப்படுகிறது என்பதை திரையுலகை சேர்ந்தவர்களுக்கு மட்டுமே தெரிந்த ரகசியம்.அதை அப்பட்டமாய் உரித்திருக்கிறார் ஆசிரியர். 

                              ஸ்ரீதர், ராம். சுரேந்திரன், நித்யா, பிரேமி, திருப்பூர் மணி, ராம்ராஜ் என ஒவ்வொரு பாத்திர படைப்புகளும் அருமை. ஒவ்வொரு கேரக்டர்களும் ஒரு விதம். விறுவிறுப்பாக நாவலை முழுதும் ரசிக்க வைக்கிறது..நட்பு, காதல், காமம், துரோகம் என எல்லாமும் நிறைந்திருக்கிறது இந்த நாவலில்.

                         ஒரு திரைப்படம் உருவாக எத்தனையோ பேர் உழைப்பு காரணமாகிறது.கஷ்டபட்டு உருவாக்கிய திரைப்படம் திரைக்கு வராமலே முடங்குவதால் எத்தனையோ பேரின் உழைப்பும் திறமையும் வீணாகி போய்விடுகிறது.அதை விரிவாய் நாவலில் விறுவிறுப்புடன் படிக்க சுவாரஸ்யத்துடன் எழுதி இருக்கிறார்.இந்த நாவலில் வரும் இயக்குநர் ராம்ராஜ் அத்தியாயங்கள் ஒரு விக்ரமன் படம் பார்த்தது போல் இருக்கிறது.அவ்வளவு அருமை.சோக காட்சிகள் வந்தால் எப்படி தொண்டையை துக்கம் கவ்வுமே, அது மாதிரி அவரது அத்தியாயங்கள்.கடைசி கிளைமாக்ஸில் ஒரு திரைப்படம் பார்த்த விளைவு.

                           படிக்க படிக்க செம இண்ட்ரஸ்டிங்கான நாவல்.திரையுலகில் திரைக்கு பின்னால் நடக்கும் சம்பவங்களை ஒளிவுமறைவின்றி சொல்லி இருக்கிறார் நாவலின் இயக்குநர்.இந்த நாவலில் ஒரே ஒரு குறைதான்.நாவல் முழுக்க விரவிக்கிடக்கும் வாக்கிய

எழுத்துப் பிழைதான்.தமிழை தப்பாகவே எழுதி இருந்தாலும் படித்துவிடக்கூடிய நிலையில் இருந்தாலும், எழுத்துப்பிழை இருப்பதால் கவனம் சிதறுகிறது. அதையும் தாண்டி இந்த நாவல் படிக்க படிக்க நன்றாகவே இருக்கிறது.

                           இந்நாவலை படித்து முடிக்கையில் வெள்ளித்திரை படம் கண்ணுக்கு முன்னால் வந்து செல்கிறது.

வாழ்த்துக்கள் கேபிள் சங்கர்.

நேசங்களுடன்

ஜீவானந்தம்

இன்னும் கொஞ்சம்...

கோவை மெஸ் -ஹோட்டல் தேவி , கடலூர், KOVAI MESS - HOTEL DEVI , CUDDALORE

                   சிதம்பரம் போன போது பக்கத்துல தான் பாண்டிச்சேரி பார்டரு...போனா கொஞ்சம் குவாலிட்டியா நமக்கு வேண்டியதை சாப்பிட்டு விட்டு வரலாம் என்று உள் மனசு சொல்லியதால் தமிழக அரசாங்கத்தின் வருமானத்தை இன்று ஒரு நாள் தள்ளி வைக்கலாம் என்று நினைத்த படியே கடலூருக்கு பஸ் ஏறினேன்.ஆகவேண்டியதை எல்லாம் முடித்து விட்டு, சாப்பிட எந்த ஹோட்டலுக்கு போகலாம் என்று நிறைய பேரை கேட்டதில் அனைவரும் சொன்னது இந்த ஹோட்டலைத் தான்.

கடலூரில் உள்ள மிகப் பிரபலமான உணவகம் தேவி ஹோட்டல்.கடலூர் டூ சிதம்பரம் ரோட்டில் இருக்கிறது.கடலூரின் வெயிலுக்கு ஒதுங்க கூடிய ஏசி ரெஸ்டாரண்டாய் இந்த ஹோட்டல் இருக்கிறது.

ஏசி ஹோட்டல்.இன்டீரியர் அமைப்பில் அருமையாக இருக்கிறது.மதிய நேரம் என்பதால் என்னவோ கூட்டம் முண்டியடிக்கிறது.தோதான இடம் தேடி அமர்ந்து சுத்தி முத்தி பார்த்ததில் முழுக்க முழுக்க குடும்பங்கள் தான்.வீட்டில் யாரும் சமைப்பதில்லை போல....

உள் அமர்ந்ததும் முதலில் சூப் ஒன்றை தருகிறார்கள்.அதற்கு பின் ஆர்டர்.ஆர்டரிட்டதும் வரிசையாய் வந்து சேர்கிறது.இறால் பிரை. அளவான சைசில் உள்ள இறால்களுடன் மசால் சேர்ந்து செம ருசியாய் இருக்கிறது.அதே போல குடல் வறுவலும்.செம டேஸ்ட்.

அளவான காரத்துடன் மிக மிக அம்சமாய் இருக்கிறது.

இங்கே ஸ்பெசல் என சொல்லப்படும் மல்லி சிக்கன் பயங்கர சுவை.அமோகம்.மொறு மொறுவென்று சில்லியாக சாப்பிட சுவையாக இருக்கிறது.பச்சை பசேலென சுவையுடன் இருக்கிறது.

ஹோட்டல் நிறைந்து இருக்கிறது.கூட்டம் கூட்டமாய் குவிகிறார்கள்.விதவிதமான அனைத்து உணவுகளும் மிக ருசியாய் கிடைக்கிறது.

கடலூரில் தவற விடாத உணவகம் தேவி ஹோட்டல்.

நேசங்களுடன்

ஜீவானந்தம்

இன்னும் கொஞ்சம்...

INFUSIONS - CHOCOLATE, RAM NAGAR, COIMBATORE - சாக்லேட் , கோவை

சாக்லேட்.

இதை மிகவும் விரும்பி சாப்பிடாதவர்கள் இவ்வுலகில் இருக்கவே முடியாது.

குழந்தைகள், பெண்களின் பேவரைட் சாக்லேட் தான்.அன்பை சொல்ல அழகான வழி மைசூர்பாவில் மட்டுமல்ல இந்த சாக்லேட்டிலும் இருக்கிறது.

சிறுவயதில் இருந்தே சாக்லேட் என்பதை பிளாஸ்டிக் உறையில் சுற்றப்பட்டிருப்பதை இதுவரைக்கும் சாப்பிட்டுக் கொண்டு வந்திருக்கிறோம்.

கோடை மலை வாசஸ்தலங்களுக்கு போனால் மில்க் சாக்லெட், காபி சாக்லேட் , நட்ஸ் போட்ட சாக்லேட்களை சாப்பிட்டிருக்கிறோம்.

ஆனால் இங்கொருவர் சாக்லேட் தயாரிப்பில் பலவித சுவைகளில் கொடுத்துக் கொண்டிருக்கிறார்..அதுவும் எப்படி.. நம்மூரில் கிடைக்கும் காய்கறிகள், பழங்களின் சுவைகளில் கேரளாவில் இருந்து தருவிக்கப்படும் இயற்கை கோகோ வை பயன்படுத்தி சுவை மணம் மாறாமல் தருகிறார்.

கிரீன் சில்லி சாக்லேட்.
பீட்ரூட் ஹல்வா சாக்லேட்
மேங்கோ சாக்லேட்
முருங்கை லெமன் சாக்லேட்
கோகோனட் சாக்லேட்
ப்ரூ காபி சாக்லேட்
மேங்கோ லஸ்ஸி சாக்லேட்
பனைவெல்லம் சாக்லேட்
ராகி சாக்லேட்
மஞ்சள் பெப்பர் சாக்லேட்
இப்படி நிறைய வெரைட்டிகள்..

கோகோவினை மட்டும் முதன்மையாக கொண்டு, அதனுள் நம்மூர் வகை பழங்களை அதன் தன்மை கெடாது சுவையூட்டி இந்த வகை சாக்லேட்களை தயாரிக்கிறார்.இதற்காக இவர் தனி ஆய்வகம் ஒன்றை நடத்தியும் வருகிறார்.சாக்லேட் தயாரிப்பில் புதுமைகளை புகுத்தியதற்காக இவர் அவார்ட் கூட வாங்கி இருக்கிறார்.

அமெரிக்காவில் சாக்லேட் பற்றின துறையில் மாஸ்டர் டிகிரி முடித்து விட்டு சாக்லேட் மீதான ஆர்வத்தில் இந்த INFUSIONS எனப்படும் சாக்லேட் அவுட்லெட்ஐ திறந்திருக்கிறார்.

கோவை ராம்நகரில் தாரகராம் சில்க்ஸ் அருகே இந்த கடை இருக்கிறது.

சாக்லேட் வகையில் அனைத்து மெனுக்களும் இருக்கின்றன.

இன்னும் புதுப்புது வெரைட்டிகளை தயாரிப்பதில் ஆர்வம் கொண்டுள்ளார்.

சாக்லேட் மெனுக்களின் விலை கோவைக்கு ஏற்றார் போல் இருக்கிறது.

வீடியோ வடிவில் காண நமது kovai food street youtube சேனலை பாருங்கள்.KOVAI STREET FOOD

நேசங்களுடன்

ஜீவானந்தம்

இன்னும் கொஞ்சம்...