பயணம் - அதிசயம் தீம்பார்க், மதுரை

                    ஆயுத பூஜை விடுமுறை தினங்களில் எங்காவது போலாமே அப்படின்னு ஒரு இடத்துக்கு போனது மதுரையில் இருக்கிற அதிசயம் தீம் பார்க். திண்டுக்கல்லில் இருந்து மதுரை செல்லும் வழியில் அதிசயம் தீம் பார்க்கின் ஒன்றிரண்டு விளம்பர போர்டுகள், இதைக் கண்டவுடன் இன்னும் இதயத்துடிப்பும் ஆவலும் அதிகமானது.மதுரையின் நுழைவாயிலான பரவை என்கிற ஊர் வந்தவுடன் கொஞ்ச தூரத்தில் அதிசயம் தீம் பார்க்கினை அடைந்தோம்.ஆரவாரமின்றி பரபரப்பின்றி இருந்த கார் பார்க்கிங்கில் சில பல கார்கள் தத்தம் உறவினர்களை உள்ளே அனுப்பிவிட்டு ஓய்வெடுத்துக் கொண்டிருந்தன.நாங்களும் ஓரமாய் நிறுத்திவிட்டு உள்ளே செல்ல ஆயத்தமானோம்.

           
         தீம்பார்க்கின் உள்ளே நுழையும் குழந்தைகளை,  சிறுவர்களை, பெரியவர்களை கவரும் (மிரட்டும்) வண்ணம் ஒரு கொரில்லா குரங்கு சிலை நம்மை வரவேற்கிறது.அடுத்தபக்கம் தீம்பார்க்கின் ஒட்டு மொத்த மினியேச்சர் மாடல் ஒரு கண்ணாடி பேழைக்குள் அலங்கரிக்கப்பட்டு இருக்கிறது.

  நெரிசலே இல்லாத டிக்கட் கவுண்டரில் எங்களுக்குண்டான டிக்கெட்டை பெற்றுக்கொண்டு (ரூ 500 பெரியவங்களுக்கு, ரூ 300 குழந்தைகளுக்கு)  உள்ளே  நுழைந்தோம்

              
                      பலத்த ஆச்சரியத்துடன் வந்த எனக்கு அதிசயம் காத்துக் கொண்டிருந்தது. வெறிச்சோடிக்கிடந்த தீம்பார்க் என் ஆவலை ஆயுட்குறைவாக்கியிருந்தது. அங்கொன்றும் இங்கொன்றுமாய் ஆட்களின் தலை மட்டுப்பட ஆரம்பித்தது.பரந்து விரிந்து கலர்புல்லாய் காட்சியளித்த வாட்டர் கேம்ஸ்கள் ஒரு சில ஆட்களால் விளையாடப்பட்டுக் கொண்டிருந்தது.சுத்தி முத்தி பார்த்தாலும் இருநூறுக்கும் குறைவான ஆட்களே மையம் கொண்டிருந்தனர்.

            
                 ஒவ்வொரு விளையாட்டிலும் பெயரளவுக்கு மட்டுமே தண்ணீர் நிரப்பப்பட்டிருந்தது.அதிலும் ரப்பர் டூயுப்களை இட்டு சந்தோசத்தினை அனுபவித்துக்கொண்டிருந்தனர். அடிக்கிற வெயிலில் தண்ணீரின் குளுமை மாறி சுடு நீராய் ஆரம்பித்து சீக்கிரம் ஆவியாகிக் கொண்டிருந்தது இருக்கின்ற கொஞ்சநஞ்ச தண்ணீரும்.மேலிலிருந்து கீழ் சறுக்கி வரும் விளையாட்டினை கொண்டாட ஒவ்வொருவரும் ரப்பர் ட்யூப்கள், ரப்பர் பேடுகள் சுமந்து கொண்டு மேலேறிக்கொண்டிருந்தனர்.தீம்பார்க்கின் வேலையாட்கள் இருவர் ஒவ்வொரு இடங்களிலும் இருக்கிற கொஞ்ச தண்ணீரிலும் வலை போட்டு பிடித்துக்கொண்டிருந்தனர் சேர்ந்துவிட்ட மிதந்த குப்பைகளை...

   
பெரிய பெரிய தீம்பார்க்குக்களில் வீகா லேண்ட், பிளாக் தண்டர் போன்றவைகளில் விளையாண்ட அனுபவம் இருப்பதால் என்னவோ இங்கு இந்த நிகழ்வுகளைக்கண்டதும் மனம் வாடிப்போனது. எதிர்பார்ப்பில் வந்த எனக்கு கொஞ்சம்...கொஞ்சமல்ல ..நிறைய ஏமாற்றமே.அதிலும் அம்மணிகளின் எண்ணிக்கையும் அதிகமாக இல்லாமல் போனது மிக வருத்தமே.....

               வந்ததுக்காக கொடுத்த காசுக்காக நாமும் தண்ணீரில் இறங்குவோம் என்றெண்ணி லாக்கர் வாங்கி அதில் துணிமணிகளை பொதித்துவிட்டு நீச்சல் டிரஸ்ஸில் (சத்தியமா டூ பீஸ் தான்.....) செயற்கை அலை வரும் வேவ் குளத்தில் நீராட ஆரம்பித்தேன்.அங்கும் குறைவான தண்ணீரே...அடிக்கிற வெயிலுக்கு இதமாய் இருக்கட்டுமே என்று நீர்யானையாய் தண்ணீரில் மூழ்கியும் மூழ்காமலும் கிடந்தேன்.வருவதும் போவதுமாக இருந்த அம்மணிகளை ரசித்தவாறே தண்ணீரில் தவளையாய் கிடந்தேன்

       
பசிக்கிற நேரம் வரவும் ஈரத்துடனே சாப்பாட்டு இடத்திற்கு செல்ல, அங்கே வெஜிடபிள் பிரியாணியுடன் ஓடு உரிக்காத முட்டையுடன் வைத்து கொடுத்துக்கொண்டிருந்தனர்.(விலைக்குத்தான்) எங்கள் பங்கிற்கு வாங்கிக்கொண்டு டேபிளை அடைந்தோம்.முட்டையை உரித்து அதை வெஜிடபிள் பிரியாணியில் வைத்து அசைவ பிரியாணியாய் சாப்பிட ஆரம்பித்தோம்.

           
தண்ணீர் குறைவான காரணத்தினால் அதிகமாய் விளையாட வாட்டர் கேம்ஸ்களில் ஈடுபாடு இல்லாததால் ட்ரை கேம்ஸ் ஆட கிளம்பினோம்.ராட்டினம், கப்பல், ஸ்விங் இது போன்று நிறைய இருக்கின்றன.இயங்குகின்ற விளையாட்டு சாதனங்களை விட பழுது பட்டிருக்கிற சாதனங்கள்தான் அதிகமாக இருக்கின்றன.எது ஓடக்கூடியதோ அதிலே அனைவரும் பயணித்தோம். பாதுகாப்பு என்பது கொஞ்சம் கேள்விக்குறியாக இருக்கிறது அனைத்து விளையாட்டு சாதனங்களிலும்.ஆனாலும் ரசிக்க வைக்கிறது ஒரு சில விளையாட்டுக்கள்.

இருக்கிற விளையாட்டுக்களை விளையாண்டு விட்டு திரிலியம் என்கிற போர்டு பார்த்து அங்கே சென்றோம்.மினி தியேட்டர் அது. சிங்கப்பூரிலும், மலேசியாவிலும் பார்த்த 6டி, 7டி காட்சிகளை இங்கு 2டியில் காட்ட மனம் இன்னும் பாதிப்படைந்தது.ஆனாலும் ரசிக்க வைத்தது ஒரு சில காட்சிகள்.புதிதாய் காண்பவர்களுக்கு இது ஒரு அதிசயமே..

அடுத்து போனது போட் ஹவுஸ்...இதிலும் ஒரு சில போட்கள் உதவாக்கரையாக கரை மேல் இருந்தது அதிசயமே..அங்கிருந்த நீந்தக்கூடிய போட்களில் மிதிப்பவை, ஸ்டீரியங் போன்ற ஏதாவது ஒன்று உடைந்திருந்தது அதிசயமே..ஆனாலும் போட் எடுத்துக்கொண்டு நீர் மேல் பயணித்தோம் ஆபத்தில்லாமல்.ஏனெனில் மூன்றடிக்கும் குறைவான ஆழமே இருப்பது அதிசயமே...

 மொத்தத்தில் இது அனைத்தும் அதிசயமே..புதிதாய் வருபவர்களுக்கு மட்டும் இது அதிசயம்.குழந்தைகள் நீரில் விளையாட எப்போதுமே ஆசைப்படுவார்கள்.அந்த மாதிரி வரும் குழந்தைகளுக்கு  இந்த இடம் அதிசயமே.குடும்பத்துடன் வந்து விடுமுறையை கொண்டாட வருபவர்கள் திரும்பி இனி வருவது அதிசயமே..அதே மாதிரி தள்ளிக்கொண்டு, கரக்ட் பண்ணிக்கொண்டு வரும் நபர்களுக்கு இது ஆகச்சிறந்த அதிசயம்.(ஏன்னா மக்கள் யாரும் இருக்க மாட்டாங்க) பாதுகாப்பு வசதிகள் என்பது குறைவுதான்.விருப்பம் இருப்பவர்கள் சென்று வாருங்கள்.

               தண்ணீரில் திரில் ரைடு செல்பவர்கள் தத்தம் நலன் காப்பது முக்கியம்.வளைந்து வளைந்து செல்லும் அனைத்து வாட்டர் கேமிலும் தண்ணீர் வரத்து குறைவாக இருக்கிறது.சறுக்கிவிழும் பகுதியில் ஆங்காங்கே ஜாயிண்ட் செய்த பிளாஸ்டிக் போர்டுகள் துருத்திக்கொண்டு நிற்கின்றன.ஆட்களுக்கும் சேதாரம் ஏற்படுவது அடிக்கடி நிகழ்கிறது.

                     ஒரு வாட்டர் கேமில் மேலிருந்து ட்யூபில் வைத்து தள்ளிவிடுவார்கள் அது வழுக்கிக்கொண்டு வளைந்து வளைந்து வரும். ரொம்ப திரில்லிங்காக இருக்கும்.ஆனால் அந்த விளையாட்டினை பார்க்க நமக்கு படுபயங்கரமாக இருக்கிறது.அன்னிக்கு அப்படித்தான் ஒரு வாலிபர் மேலிருந்து ட்யூபில் அமர்ந்து வருகிறார்.இங்கிருந்து பார்த்தா வளைந்து வளைந்து வரும் அந்த கேமில் முதலில் ட்யூப் மட்டும் தான் வருது.ஆளைக்காணோம்.சற்று நேரத்தில் தவழ்ந்தபடி அந்த வளைவுகளில் தவ்வி தவ்வி வந்து தண்ணீர் குளத்தினுள் விழுகிறார்.அதற்குள் மேலிருந்து இன்னொருவர் வந்து அவர்மேல் விழுந்த காட்சி காமெடியாக இருந்தாலும் ஆபத்தாக இருக்கிறது.

              இது போன்ற இடங்களில் முதலுதவி பெட்டி அவசியம்.ஆனால் அது இருப்பதை காணமுடிவதில்லை. அதுபோலவே ரப்பர் ட்யூப்களும் பஞ்சராகி கிடக்கின்றன.அதற்கு மட்டும் உடனடி முதலுதவி அளிக்கப்படுகிறது. ஆம்....அதைத் தைப்பதற்கென்றே ஒரு குழு மரத்தடியில் இயங்கிக் கொண்டிருக்கிறது.மனுசங்களுக்கு மட்டும் இல்லை மருத்துவக்குழு

          

மொத்தத்தில் காசுக்கு பிடிச்ச கேடு......விலை கூட அதிகம்தான்.பராமரிப்பு கூட அதிசயமாக நடக்கிறது.

நேசங்களுடன்

ஜீவானந்தம்

இன்னும் கொஞ்சம்...

கோவை மெஸ் - தாஸ் லாட்ஜ் கேண்டீன், நஞ்சப்பா ரோடு, உப்பிலிபாளையம், கோவை

தாஸ் லாட்ஜ் கேண்டீன்

கோவையில நஞ்சப்பா ரோடு உப்பிலிபாளையம் ஏரியா அப்படின்னாலே மோட்டார் பம்பு உதிரி பாகங்கள் எலக்ட்ரிகல் சாமான்கள் மற்றும் ஹார்டுவேர் கடைகள் தான் ஞாபகத்துல வரும்.ஆனா அங்கயும் ஒரு ஹோட்டலோட புரோட்டா ஞாபகத்துக்கு வரும்.அதுதான் தாஸ் லாட்ஜ் கேண்டீன்.

கிட்டத்தட்ட ரொம்ப வருசமா இருக்கு இந்த கடை.சின்ன கடை தான்.டீ பஜ்ஜிக்காக ஆரம்பித்த கடை இன்று ஒரு ஹோட்டலாக உருவெடுத்து இருக்கிறது.உட்கார்ந்து சாப்பிடக்கூடிய இடம் குறைவுதான்.ஆனால் அதைப்பொருட்படுத்தாமல் நின்று கொண்டே சாப்பிட்டு விட்டு செல்லும் வாடிக்கையாளர்கள் தான் அதிகம்.காலையில் இருந்து இரவு வரைக்கும் ஓயாமல் வியாபாரம் நடக்கும் இடம்.

காலையில் டீ காபி டிஃபன், போண்டா பஜ்ஜி வகைகளுடன் ஆரம்பிக்கிற இந்த கடை இரவு வரை நீடிக்கிறது.மதியம் விதவிதமான பலவகை சாதங்களுடன் பொட்டலமாக கட்டி விற்கின்றனர்.தக்காளி சாதம், தயிர் சாதம், பிரியாணி, சாம்பார் சாதம் என நிறைய வெரைட்டிகள் இருக்கின்றன.

அதே மாதிரி எண்ணெய் பலகாரங்களில் வடை, போண்டா, பஜ்ஜி, உளுந்து வடை, மசால் வடை, முட்டைப்போண்டா, மிளகாய் பஜ்ஜி, என ஏகத்துக்கும் இருக்கிறது.பலகாரங்களின் தட்டு காலியாக காலியாக அனைத்து வகைகளும் அவ்வப்போது பக்கத்துலயே இருக்கும் போண்டா மாஸ்டரின் கண்ணும் கருத்துமான கைவண்ணத்தில் சூடாக நிரம்பிக்கொண்டே இருக்கும்.

மதியவேளைக்கு ஒரு பொட்டலம் சாப்பாடு வாங்கிக் கொண்டு கூட ஏதாவது ஒரு பலகாரத்தினை வாங்கிகொண்டு இருக்கிற இடத்தில் அமர்ந்தோ நின்று கொண்டோ சாப்பிட்டால் செம டேஸ்டாக இருக்கும்.அனைத்து சாப்பாடுகள் வெளியில் தயாராகி இங்கு விற்பனைக்கு மட்டும் வருகின்றன அதுவும் சூடாக...

சாயந்திர வேளையில் இங்கு தயாராகும் புரோட்டாக்கள் செம டேஸ்டாக இருக்கும்.மாலை 4 மணி முதல் புரோட்டா விற்பனை சூடுபிடிக்க ஆரம்பித்துவிடும்.சுடச்சுட புரோட்டா சாப்பிடனுமா இந்த கடைக்கு போங்க.குருமா, முட்டைமசால், சிக்கன் குருமா என எல்லாம் இருக்கிறது புரோட்டாவிற்கு தொட்டுக்கொள்ள...

இட வசதிமட்டும் தான் இல்லை.ஆனால் கூட்டம் அதைப்பத்தி கவலைப்படுவதாக இல்லை.நின்று கொண்டே சாப்பிட்டுவிட்டு தட்டினை ...இடத்தினை காலி செய்கின்றனர்.

பக்கத்து மாநிலமான கேரளாவிலிருந்து வரும் சேட்டன்கள் அதிகம் இங்கு குவிவதைப் பார்க்கலாம்.குறைந்த விலை, செமத்தியான டேஸ்ட் இருப்பதால் கூட்டம் எப்பவும் இருக்கிறது.அதுமட்டுமல்ல அந்த ஏரியாவில் இருக்கிற அத்துணை கடைக்காரர்களும் ஆபத்பாந்தவனாய் இருக்கிறது இந்த கடை.அந்த ஏரியாவில் புகழ்பெற்ற கடை இது ஒன்றுதான்.

நேசங்களுடன்

ஜீவான்ந்தம்

இன்னும் கொஞ்சம்...

பயணம் - கொடைக்கானல்...ஒரு பார்வை

திண்டுக்கல்லில் இருக்கும் போது தீடீர்னு ஒரு யோசனை..இவ்ளோ தூரம் வந்திருக்கோமே......கொடைக்கானல் வேற இங்க பக்கத்துல தானே இருக்கு ஏன் போகக்கூடாது அப்படின்னு.நாம என்ன ஹனிமூன் கப்பிள்ஸா...ரொம்ப நாள் முன்னாடியே ரூம்லாம் புக் பண்ணிட்டு போறதுக்கு......சரி கிளம்புவோம்..அப்படின்னு கூட திண்டுக்கல் நண்பர்களையும் இழுத்துப் போட்டுக்கிட்டு கிளம்பினேன்.மாலை 4 மணி ஆயிடுச்சு வத்தலகுண்டு போகவே.மலை ஏறதுக்குள்ள இருட்டிடும் அதனால இங்கயே எல்லாத்தையும் முடிச்சிட்டு போயிடுவோம்னு நம்ம கடைக்கு போய் சாப்பிட்டுவிட்டு வேணுங்கிறத பார்சல் வாங்கிட்டு மலை ஏற ஆரம்பித்தோம்..அந்த மாலை வேளையிலும் பசுமை இன்னும் மாறாமல் இருந்தது.

வளைந்து நெளிந்து செல்லும் சாலையில் இருமருங்கிலும் அடர்ந்த பசுமை வரவேற்றது எங்களின் வருகையை...குளிர் காற்று மெலிதாய் வீச ஆரம்பிக்க வெகு விரைவிலேயே பெருமாள் மலை அடைந்து விட்டோம்.. ஆனாலும் இருட்டாகி விட்டது.குளிருக்கு ஏத்த போர்வையை உள்ளே போர்த்தி இருந்ததால் அதிகம் குளிர் தெரியவில்லை.பனி படர்ந்த இரவினில் இனி எங்கேயும் சுத்த முடியாது என்பதால் நண்பரின் காட்டேஜ்க்கு குடியேறினோம்.

இரவின் குளிரில் மித கதகதப்பாய் உணர்ந்தோம்.நடு நிசி இரவு வரை நீண்ட எங்களின் முந்தைய வரலாறுகளை உணர்ந்து உருவகித்து பேசி உண்டு களித்தோம்.அப்படியே தூங்கிப்போனோம்.

காலை சுள்ளென்று சூரியன் விழிக்க நாங்கள் உடனடியாக உதித்துக் கொண்டோம்.அந்த காலை வேளையிலும் உடலினை சுறுசுறுப்பாக வைத்திருக்க கைவசம் கொண்டிருந்த மருந்தினை ஒரு லார்ஜ் விழுங்கிக்கொண்டோம்.குளிருக்கு பழக்கமாகிப்போனது உடலும் மனசும்.

நேற்றைய மகிழ்ச்சியினை மீண்டும் ஒரு முறை ஞாபகப்படுத்திக்கொண்டு குளித்துவிட்டு கிளம்ப ஆரம்பித்தோம்.

                சுற்றுலாப்பயணிகள் வந்து சேராமல் துடைத்து வைத்தது போல கொடைக்கானல் ரோடுகள் இருக்க,சுற்றும் முற்றும் வேடிக்கைப்பார்த்தபடியே அதில் பயணித்தோம்.

கொடைக்கானல் வந்ததுக்காக ஒரு சிறு சுற்றுலாவாக மட்டும் பார்ப்போம் என்றெண்ணி போனது போட் ஹவுஸ்...

அமைதியாய் பச்சைப்பசேலென்று குளம் இருக்க வாக்கிங் செல்பவர்கள் இயற்கையை ரசித்து சுத்தமான காற்றினை சுவாசித்துக்கொண்டு சென்று கொண்டிருந்தனர்.இன்னும் வியாபாரத்தினை துவக்காமல் இழுத்துப் போர்த்தியபடி கடைகள் இருக்க நாங்கள் முன்கூட்டியே வந்து விட்டதை எண்ணி ஆச்சர்யப்பட்டோம்.

அந்த காலை வேளையிலும் குதிரைகளும் அதன் உரிமையாளர்களும் இன்றைய வரும்படிக்காக காத்துக்கொண்டிருந்தனர்.கூடவே தள்ளுவண்டிக் கடைக்காரரும்....பொழுது போகாமலிருக்க தினத்தந்தியை ஒப்புவித்துக் கொண்டிருந்தனர்..

அந்த இடத்தில் நம் வருகையினைப் பார்த்தவுடன் குதிரைகளுக்கும் அங்கிருந்த ஜாக்கிகளுக்கும் அப்படி ஒரு சந்தோசம்  தெரிந்தது அவர்களது முகத்தில்.முதல் போணியாய் நான் ஒரு குதிரையை தேர்ந்தெடுத்து தேசிங்கு ராஜாவாய் அமர்ந்தேன்.குதிரை முன்னும் பின்னும் போக ......இன்னும் கொஞ்ச நேரத்தில் என் வெயிட் தாங்காமல் அலறிவிடுமோ என்றெண்ணி, ஒரு வாயில்லா ஜீவனை வதைத்த பாவத்திற்கு ஆளாக வேண்டாமே என்று உடனே இறங்கிவிட்டேன்.அந்த சைக்கிள் கேப்பிலும் என் வரலாறினைப் பதித்துக் கொண்டேன் புகைப்படங்களாய்...

அப்புறம் அங்கிருந்த ஒரு கடையில் குளிருக்கு சூடாய் டீ சாப்பிட ஆரம்பிக்கையில் கடந்து சென்ற ஒரு காலேஜ் டூர் பஸ்ஸின் அம்மணிகளின் சத்தம் எங்கள் காதைப்பிளந்தது.ரசித்துக்கொண்டே ருசிக்கையில் எங்களை தாண்டிச் சென்ற ஒரு வட இந்திய ஹனிமூன் கப்பிள்ஸின் பாவனைகள் நேற்றைய இரவின் மிச்சங்களை இன்றும் தொடர்வதற்கான அறிகுறிகளை அவர்களின் நெருக்கத்தில் கண்டோம். அதைப்பார்த்துக் கொண்டிருக்கும் போதே இளம் சூடான புகை வெளியேறிக் கொண்டிருந்தது டீ டம்ளரிலிருந்து மட்டுமல்ல....

             மனதை கொஞ்சம் ஆசுவாசப்படுத்திக்கொண்டு அங்கிருந்து நகர ஆரம்பித்தோம்.திரும்ப திண்டுக்கல் செல்ல ஆயத்தமானோம்.கிளம்பி வருகையில் வெள்ளி நீர்வீழ்ச்சி அருவியின் அருகே அம்மணிகள் வரிசை கட்டி ரசித்துக்கொண்டிருக்க ஆட்டோமேட்டிக்காய் வண்டி நின்றது.இறங்கி அருவியை ரசித்துவிட்டு (?) நம் வரலாறுக்காக புகைப்படங்களை எடுத்து விட்டு கீழிறங்கினோம்.

வரும் வழியில் ஒரு இடத்தில் வண்டியை நிறுத்தி இது மன்மதன் அம்பு பாறை என நண்பன் சொல்லவே...காரணம் கேட்க இந்த இடத்தில் தான் மன்மதன் அம்பு படம் சூட்டிங்க் எடுத்தார்கள் என்றான்.

அங்கயும் ஒரு சில போட்டோக்களை எடுத்துவிட்டு திண்டுக்கல் வந்தடைந்தோம்.மீண்டும் செல்லக்கூடிய வாய்ப்புகள் இருப்பதாகவே இந்த பயணம் இருந்தது.ஏனெனில் பார்க்கவேண்டிய இடங்கள் இன்னும் நிறைய இருக்கின்றன.

நேசங்களுடன்

ஜீவானந்தம்

இன்னும் கொஞ்சம்...

கோவை மெஸ் - மண்பானை உணவகம், சாலைப்புதூர், வத்தலகுண்டு

ஒரு மத்தியான வேளை திண்டுக்கல்லில் இருந்து கொடைக்கானல் போயிட்டு இருக்கும் போது பசி எடுக்கவே நம்ம நண்பரிடம் கேட்க அவர் கொஞ்சம் வெயிட் பண்ணு, ஒரு நல்ல ஹோட்டலைக் காட்டறேன் என்று சொல்லியபடியே வத்தலகுண்டு ரோட்டில் சாலைப்புதூர் என்கிற ஊர் வந்தவுடன் நம்ம சிங்கத்தினை ஓரம் கட்ட சொல்ல இறங்கின இடம் மண்பானை சமையல் ஹோட்டல்.அந்த ஊரில் இன்னும் சில ஹோட்டல்கள் இருந்தாலும் இங்குதான் நன்றாக இருக்கும் என்று அழைத்துச் சென்றார்.அண்ணாத்துரை என்பவர் தான் முதலில் இந்த வகை சமையலை ஆரம்பித்து இருக்கிறார்.வியாபாரம் பிச்சிக்கவே அந்த ஏரியாவில் நிறைய மண்பானை சமையல் செய்து தரும் ஹோட்டல்கள் முளைத்து விட்டிருக்கின்றன.ஆனால் சுவை இங்குதான் நன்றாக இருக்கும் என்று கேட்டபடியே உள் நுழைந்தோம்.

சிறு குடிசை போல் தான் இருக்கிறது.ஆனால் ஆஸ்பெஸ்டால் சீட் போட்டு இருக்கிறார்கள்.இடது புறம் சமையல் கட்டில் விறகு அடுப்பில் ஒரு மண்பானையில் சாதமோ குழம்போ வெந்து கொண்டிருந்தது.எந்த ஒரு அலங்காரமும் இல்லாமல் கிராமத்து பாணியில் இருக்கிறது ஹோட்டல்.

அமர்ந்தவுடன் இலை போட்டு தண்ணீர் தெளித்துவிட்டு என்ன இருக்குண்ணே...என்று கேட்க, சாதம், மட்டன் குழம்பு, சிக்கன் வருவல், முட்டை என சொல்ல, ( ரொம்ப நேரம் ஆனதால் ஆட்டோட மத்த பார்ட்ஸ் எல்லாம் தீர்ந்துவிட்டதாம்..)

சரி சாப்பாடு மற்றும் சிக்கன் வகையறாக்கள் சொல்ல உடனே மண்பானையில் இருந்து சூடாக சாதம் எடுத்து வந்து இலையில் கொட்டினர்.அதே மாதிரி குழம்பும்...எப்பவும் போல பொரியல் அப்பளம்.

நன்றாக இருக்கிறது.அளவாய் உப்பும் காரமும் இருக்கிறது.சாதம் பொலபொலவென்று நன்றாக இருக்கிறது.

சிக்கன் மற்றும் மட்டன் சுக்கா நன்றாக இருக்கிறது.அளவு குறைவுதான்.அதனால் தான் விலையும் குறைவாக இருக்கிறது.

குழி கரண்டி ஆம்லெட் கேட்க அதுவும் சூடாக வந்தது.நன்றாக இருக்கிறது அனைத்தும்.

இந்த ஹோட்டலில் வெளி ஆட்கள் யாரும் வேலை செய்வதில்லை..குடும்ப உறுப்பினர்களே வேலை செய்து வருகின்றனர்.

சுற்றுலா செல்லும் பயணிகளின் வருகை அதிகமாக இருக்குமாம் சனி ஞாயிறு அன்று.ரோட்டின் இரு பக்கமும் கார்களின் வரிசை அணிவகுக்குமாம்.

விலையும் குறைவாகத்தான் இருக்கிறது.அதே போல் சுவையாகவும் சுத்தமாகவும் இருக்கிறது.இந்த ஊரில இன்னும் சில ஹோட்டல்கள் இருப்பதால் செம காம்பெடிசனாம்.அதனால போட்டி போட்டுக்கொண்டு விலை குறைவாக அதே சமயம் ருசியாகவும் தருகிறார்கள்.கொடைக்கானல் செல்லும் அமைச்சர்கள், அதிகாரிகள் எல்லாம் இந்த ஹோட்டலுக்கு வாடிக்கையாளர்களாம்.அந்தப்பக்கம் போனால் சாப்பிட்டுவிட்டு வாருங்கள்.

திண்டுக்கல் டூ கொடைக்கானல் ரோட்டில் வத்தலகுண்டு அருகே இருக்கிறது சாலைப்புதூர்.சாப்பிட்ட பில் எவ்ளோன்னு தெரியல.சத்தியமா நான் கொடுக்கல.

நேசங்களுடன்

ஜீவானந்தம்

இன்னும் கொஞ்சம்...

கரம் - 11

இந்த மாத அந்திமழை இதழின் இளைஞர் சிறப்பிதழில் நம்ம வலைத்தளம் அறிமுகப்படுத்தப்பட்டு இருக்கிறது.கூடவே நண்பர் பிலாசபியும்.மிகவும் சந்தோசமாக இருக்கிறது. நம்மளையும் வாட்ச் பண்றாங்கப்பா என்பதில்..நம்மை அறிமுகப்படுத்திய அந்திமழை இதழ் நிருபர் அசோகன் அவர்களுக்கு நன்றி...

***********************

எலைட் பார் வருமா வராதா அப்படின்னு ஒவ்வொரு ஊரிலயும் எல்லாரும் ஏங்கிகிட்டு இருக்க சத்தமில்லாமல் திண்டுக்கல் மாவட்டத்தில் திறந்து இருக்காங்க.போய் பார்த்தா வெளிநாட்டு  மது இனங்கள் நிறையவே குவிந்து இருக்கின்றன.பார்க்கவே ஆஃப் அடித்த மாதிரி இருக்கிறது.கடையப் பார்த்தவுடன் கை அரிக்க ஆரம்பிக்கின்றது.ம்ம்ம்.....என்ன பண்றது.வந்ததுக்கு ஒண்ணு வாங்கிட்டு தான் போனேன். எலைட் பார் எங்க ஊருக்கெல்லாம் எப்ப வருமோ....ஏக்கத்துடன் 

******************

தமிழக முதல்வர் அம்மா குடிநீரை ஆரம்பிச்சாலும் ஆரம்பிச்சாங்க செம தட்டுப்பாடு இந்த பாட்டிலுக்கு.சீக்கிரம் தீர்ந்து போயிருதாம்.தண்ணீர் நல்ல டேஸ்டாக இருக்கிறது.விலை குறைவாக இருப்பதால் பொதுமக்கள் மத்தியில் செம ரெஸ்பான்ஸ்.பாட்டில்களின் எண்ணிக்கையை அதிகப்படுத்தினால் இன்னும் நன்றாக இருக்கும்.பாட்டிலில் இந்தப்பக்கம் அம்மா என்று தமிழிலும் அந்தப்பக்கம் அம்மா என்று ஆங்கிலத்திலும் என்கிரேவ் செய்யப்பட்டிருக்கிறது.பாட்டில் வடிவம் சூப்பர்.முதல்வருக்கு பிடிச்ச பச்சைக்கலரிலதான் மூடியும் ரேப்பரும் இருக்கு...தண்ணி யும் பச்சைத்தண்ணிதான்...(கலர் மிக்ஸ் பண்ணல...)

*********************

கோவையில ஒரு சுவத்துல இருந்த போஸ்டர் பார்த்தவுடன் பகீர்னு ஆயிடுச்சி.கொசு பெருகிப்போனதுக்கு வாழ்த்து போஸ்டர் அடிச்சிருக்காங்கப்பா.இப்படி ஒட்டியதை பார்த்தாவது கொசுவை ஒழிக்க மாட்டாங்களா அப்படின்னு ஒரு ஏக்கம்தான் போல..இந்த போஸ்டர் அடிச்சு ஒட்டின காசுக்கு பேசாம நிறைய  கொசுமருந்து வாங்கி கொடுத்து இருக்கலாம்.

***********************

பார்த்த படங்கள்:

சமீபத்துல வெளியான நான்கு படங்கள் பார்த்தேன்.

முதல் படம் 6 மெழுகுவர்த்திகள்.ஷாம் ரொம்ப மெனக்கெட்டு நடிச்ச படம்.எனக்கென்னவோ இந்த படம் பிடிக்கல.6 மெழுகுவர்த்திகள் எரிவதற்கு பதில் அணைந்து விட்டது.

இரண்டாவது படம். யாயா...அய்யோ செம மொக்கை படம்.ஏண்டா தியேட்டருக்கு போனோம்னு ஆச்சு..நல்லவேளை பாதி படத்துக்கு மேல தூங்கிட்டேன்.

அடுத்து மலையாளம் 24 நார்த் காதம்.பகத்ஃபாசில் நடித்த படம்.ரொம்ப பிடிச்சிருந்தது.நல்லா நடிச்சிருக்காப்ல.மேக்கப் இல்லாத ஸ்வாதி சோ க்யூட்.மறுபடி பார்க்கத்தூண்டுகிற படம்.

ஓநாயும் ஆட்டுக்குட்டியும் : மிஷ்கின் மிரட்டி இருந்த படம்.இளையராஜாவின் செமையான இசையில் படம் நன்றாக இருக்கிறது.ஆனால் இந்த படம் அந்தளவுக்கு ரீச் ஆகவில்லை.நாமக்கல்லில் மொத்தம் 13 பேர் மட்டுமே பார்த்தோம்.இதில் தியேட்டர் ஊழியர்களும் அடக்கம்.

விபத்து :
திண்டுக்கல் அருகே மதுரை பைபாஸில் ராமேஸ்வரம் சென்று திரும்பி வந்துகிட்டு இருந்த ஒரு டூரிஸ்ட் வேன் மீது லாரி மோதியதில் வேன் இரண்டாக பிளந்தது.இதில் பயணம் செய்த 20 பேரில் 4 பேர் சம்பவ இடத்திலேயே பலி ஆகிவிட்டனர்.மற்றவர்கள் ஆஸ்பத்திரியில்.சம்பவம் நடந்து 4மணி நேரம் கழித்து அப்போது தான் நான் அந்த இடத்தினை கடக்கிறேன்.இடத்தினைப்பார்க்கையில் ஒரே களேபரம்.உணவுகள், பாக்கு மட்டைத்தட்டுகள், உடைகள், என எல்லாம் சிதறி கிடந்தன.ரோட்டில் இருந்து 20 அடி தூரத்தில் வேன் கிடக்கிறது.யார் மேல் தவறு என்று தெரியவில்லை.விபத்து ஏற்படாமல் இருக்க கவனமாக ஒவ்வொருவரும் இருக்கவேண்டும் என்று சொல்லத்தோன்றுகிறது.

நேசங்களுடன்

ஜீவானந்தம்

இன்னும் கொஞ்சம்...

சமையல் - கொழுக்கட்டை

இந்த விநாயகர் சதுர்த்தி அன்னிக்கு என்னோட கிராமத்துல இருந்தேன்.அப்போ சாமிக்கு படைப்பதற்காக அம்மா கொழுக்கட்டை செஞ்சாங்க .(ஒத்தாசைக்கு கூட மாட நானும் கொஞ்சம்) நாம தான் சும்மா இருக்க மாட்டோமே..உடனே அதை போட்டோ எடுத்தாச்சு....அதுதான் இப்போ இந்த பதிவு.

தேவையான பொருட்கள்:

புழுங்கல் அரிசி - 250 கிராம்

வெல்லம் அல்லது சர்க்கரை - 200 கிராம்

பொட்டுக்கடலை - 200 கிராம்

தேங்காய் - 2 மூடி

ஏலக்காய் - சிறிது

வேர்க்கடலை - கொஞ்சம்

எள் - கொஞ்சம்

முதலில் பூரணம் செய்து கொள்ளவேண்டும்.

துருவிய தேங்காயை வாணலியில் வதக்கி ஒரு பாத்திரத்தில் எடுத்துக்கொள்ளவும், சர்க்கரை அல்லது வெல்லம் சேர்த்துக் கொள்ளவும்.அதில் வறுத்து உடைத்த வேர்க்கடலை, பொட்டுக்கடலை சேர்க்கவும்.எள் சேர்க்கவும்.ஏலக்காய் பொடித்து அதில் சேர்த்து அனைத்தையும் கலந்து கொள்ள வேண்டும்.

அடுத்து கொழுக்கட்டை மாவு 

புழுங்கல் அரிசியினை இரண்டு மணி நேரம் ஊறவைத்து பின் உப்பு சேர்த்து கொஞ்சம் கெட்டியாக அரைத்துக்கொள்ள வேண்டும்.அந்த மாவினை  வாணலியில் எண்ணெய் விட்டு தண்ணீர் சுண்டும் வரை பதமாக வதக்கி கொள்ளவேண்டும்.அந்த மாவினை சிறு சிறு உருண்டைகளாக உருட்டி குழி போல் ஆக்கி அதில் பூரணத்தினை வைக்கவேண்டும்.பின் அதை மூடி ( டிசைடிசைனாக கூட மூடலாம்) இட்லித்தட்டில் வைத்து ஆவியில் வேக வைக்க வேண்டும்.பத்து நிமிடங்களுக்கு பின் கொழுக்கட்டை ரெடி...

இப்போலாம் ரெடி மேட் கொழுக்கட்டை அச்சு வருது பிளாஸ்டிக்ல.அந்த அச்சுல மாவை வைத்து பூரணம் வைத்து ஒரு அமுக்கு அமுக்கினா கொழுக்கட்டை அழகா வந்திடும்.அதை வேக வச்சா அவ்ளோதான்...ரெடி...

காரக்கொழுக்கட்டை இதே மாதிரிதான்.ஆனால் பூரணம் தேவைப்படாது.வெங்காயம், வர மிளகாய், உப்பு, சேர்த்து மாவாக ஆட்டி சிறு சிறு உருண்டைகளாக பிடித்து இட்லித்தட்டில் வைத்து வேக வைக்க வேண்டும்.

இதை அப்படியே சாப்பிடலாம்.இல்லையேல் சாமிக்கு படைத்துவிட்டும் சாப்பிடலாம்.

நேசங்களுடன்

ஜீவானந்தம்

இன்னும் கொஞ்சம்...

கோவை மெஸ் - டயானா தூத்துக்குடி மீன் ஸ்டால், 100 அடி ரோடு காந்திபுரம், கோவை

ஒரு மதிய வேளை, காந்திபுரம் 100 அடி ரோட்டுல வந்துட்டு இருக்கும் போது கிராஸ்கட்ல ஒரு வேலை இருப்பதால் அதை பார்த்துட்டு போவோம்னுட்டு கமலா ஸ்டோர்ஸ் எதிர்த்தாப்புல நம்ம வெண் சிங்கத்தினை (வார்த்தை உபயம் கோவை ஆவி ) பார்க் பண்ணினேன்.வண்டியை நிறுத்திவிட்டு இறங்கையில் செமையான மீன் வாசம்..அதுவும் பொறிச்ச மீன் வாசம்.ஆளையே தூக்குது வேற.பார்த்தா எதிர்த்தாப்புல மீன் கடை..ஏற்கனவே இருந்த கடையை கொஞ்சம் புதுசா ஆல்டர் / இண்டீரியர்லாம் பண்ணி மறுபடியும் ஆரம்பிச்சிருக்காங்க.கடை பேரைப்பார்த்தா.... கொஞ்சம் பெருசாவே இருக்கு..ஞான செளந்தரியின் டயானா தூத்துக்குடி மீன் ஸ்டால்.

கடையைப் பார்த்தவுடன் வாசம் நோக்கி கால்கள் முன்னேற, நம்மளைப் கண்டவுடன் கடைக்காரர் சலாம் போட.. பதில் வணக்கம் சொல்லிவிட்டு நம்ம வேலையை பார்க்க ஆரம்பித்தேன்..நம்ம வேலைன்னா...அதான்...போட்டோ எடுக்கறது.....நான் போட்டோ எடுக்கறதைப்பார்த்தவுடன் என்ன சார் ஃபேஸ்புக்ல போட போறீங்களா அப்படின்னு கேட்டவரை வியப்புடன் பார்த்தவாறே இருக்க...அப்போது தான் உள்ளிருந்து வகைவகையாய் ஒவ்வொரு மீனாக மேக்கப் போட்டு வாடிக்கையாளர் வரவுக்காக வெளியில் வந்து காத்துக்கொண்டிருக்க ஆரம்பித்தன.அவைகளை வரிசைகட்டி போட்டோ எடுத்துக்கொண்டே அவரிடம் மிச்ச மீதி மீன் விவரங்களை கேட்டேன்.

பொறுமையாய் பதில் சொன்னவரிடம் இரண்டு வகையான மீன்களை பொறிக்கச் சொல்லிவிட்டு எனக்கான இடத்தினில் அமர்ந்து கொண்டேன்.கொதிக்கின்ற எண்ணையில் மீன் நன்றாக வெந்தவுடன் எனது டேபிளுக்கு வாசத்துடன் வந்தது.

எடுத்து சாப்பிடுகையில் நல்ல சுவை.பொறுமையாய் ஆற அமர மீனினை முடித்துவிட்டு வெறும் முள்ளை மட்டும் விட்டுவிட்டு அடுத்து பிரியாணி டேஸ்ட் பார்க்கலாம் என்றெண்ணி பிளைன் பிரியாணி சொன்னேன்.அது வந்தவுடன் சாப்பிட்டுப்பார்க்கையில் அதுவும் நன்றாக இருக்கிறது.அந்த பிளைன் பிரியாணியிலும் ஒளிந்து கொண்டு கடைக்காரரின் கண்ணில் தட்டுப்படாமல் வந்த இரண்டு இறால் மீன்கள் மிக மிக சுவையாக இருந்தன.இந்த பிரியாணியின் டேஸ்டும் நன்றாக இருக்கிறது.

மொத்தத்தில் பொரிச்ச மீன் இரண்டும் சூப்பர்.இன்னும் நிறைய வகைகள் இருக்கு.ஒவ்வொண்ணா இனி டேஸ்ட் பண்ண போகணும்.மேலும் டிஃபன் அயிட்டங்களும் கிடைக்கின்றன.இட்லி, ஆப்பம் மீன்குழம்பு இங்கு காம்பினேசனாக இருக்கிறது. அனைத்து வகையான கடல் மீன்களும் இருக்கின்றன.விலை 40 முதல் 120 வரை இருக்கின்றன.அப்புறம் இறால்,சிக்கன்  பிரியாணி கிடைக்கிறது.முக்கியமாய் நண்டு சூப் கிடைக்கும்.

விலை கோவைக்கே உண்டான முறையில் இருக்கிறது.மீன் துண்டுகளுக்கு தகுந்த மாதிரி விலை ஏற்றமும் இறக்கமுமாக இருக்கிறது.

அந்தப்பக்கம் போனால் சாப்பிட்டுப்பார்க்கலாம்.அதுமட்டுமல்லாது ஃபிரஷ் மீன்கள் காலையில் கிடைக்கும்.நம்ம பங்காளிகளுக்கு ஏத்த கடை வேறு.கார சாரமாக இருக்கிறது.அருகிலேயே நம்ம கடை வேற...சொல்லவா வேணும்...

இதே ரோட்டிலேயே இரண்டு வீதி தள்ளி ஜோஸ் மீன் கடை இருக்கிறது.

நேசங்களுடன்

ஜீவானந்தம்

இன்னும் கொஞ்சம்...